Кусæг балцы фæлгæты, Мæскуыйы РЦИ-Аланийы Сæргълæууæг Сергей Меняйло раныхас кодта V111-æм, «Пути трансформации государственного и корпоративного управления на современном этапе», зæгъгæ, Æппæтадæмон конференцийы.
Ацы аз конференцийы вазыгджындæр темæ уыд «Социалон архитектурæ æмæ регионалон разамынд алы бæстæты æмæ регионты: социалон-экономикон политикæйы нырыккон мадзæлттæ». Арæзт цыдис æхсæнадимæ бастдзинады Уæрæсейаг ассоциаци, МГИМО æмæ Уæрæсейы Фæсарæйнаг хъуыддæгты министрады социалон-архитектурон Центр æмæ Политикон экспертизæйы Æппæтадæмон
институты хъæппæрисæй. Пленарон æмбырды фæзы Сергей Меняйло радзырдта социалон-экономикон рæзты хæстæ æххæст кæныны фæдыл Цæгат Ирыстоны фæлтæрддзинады тыххæй.
– Социалон архитектурæ политикон архайды фæткимæ баст нæу, фæлæ адæмы хæрзхъæд цардимæ. Фæстæмæ кæсын никæмæ хъæуы, æрмæстдæр – адæммæ. Мах бацархайын хъæуы адæмæн хицауадимæ бастдзинад саразыныл æмæ адæмы домæнтæн бæлвырд дзуапп дæттыныл. Хъуамæ дыууæты ‘хсæн æууæнкдзинады таг уа, хицауиуæггæнæг оргæнтæ та кусой адæмы хорзæн, – фæнысан кодта нæ республикæйы Сæргълæууæг.
Социалон архитектурæ ныгуылæйнагæй куыд хицæн кæны, уый тыххæй та раныхас кодта Уæрæсейы Федерацийы Президенты Управленийы хицауы хæдивæг Алексей Семенов.
– Мах кусæм дыууæ фæлтæрæй. Фыццаг – паддзахадон уæрæсейаг хæзнаты бындурыл чи æнцой кæндзæн, ахæм фидæн саразыны хъуыддагыл, дыккаг æмвæзад та – «социалон проекттæ» кæй хонæм, уыдон царды рауадзыныл. Уыимæ, зæрдыл дарын хъæуы, социалон архитектурæйы сæйраг нысантæ кæй сты адæмы царды хæрзхъæд уавæртæ бæрзонддæр кæнын, социалон хи æнкъарынад æмæ æхсæнадон хæрзуаг, – загъта Алексей Семенов.
Конференци йæхимæ æрбаздæхта Уæрæсе æмæ дунейы нæ хæлар бæстæты æппæты хуыздæр разамонджыты. Се ‘хсæн – УФ-йы цалдæр регионы губернатортæ æмæ раззагдæр аналитиктæ. Пленарон æмбырды архайджытæ уыдысты Красноярскы край, Ханты-Мансийы, Кировы облæст, Камчаткæ æмæ Омскы облæсты губернатортæ Михаил Котюков, Руслан Кухарук, Александр Соколов, Владимир Солодов æмæ Виталий Хоценко.
Уый тыххæй фехъусын кодта РЦИ-Аланийы Сæргълæууæг æмæ Хицауады пресс-службæ.
Нæ уацхæссæг
