«Уæрæсе уыдис, Уæрæсе ис, Уæрæсе уыдзæн», – ахæм девизимæ райдыдта Дзæуджыхъæуы историон-патриотон проект «Уæлахизы марафон»-ы бындурыл фестиваль «И вновь продолжается бой». Мадзал цæуы 3-5 декабры Дзæуджыхъæуы, Хъæбæлоты Билары номыл Сывæллæтты сфæлдыстадон галуаны. Арæзт у Ирыстоны хъæбатырты номæн, сæрмагонд æфсæддон операцийы архайджыты кадæн.
Знон фыццаг хай байгом кадджын уавæры. Архайдтой дзы: Дзæуджыхъæуы æфсæддон комиссар Беджызты Роберт, Уæрæсейы Федерацийы хъайтар, РЦИ-Аланийы фæллой æмæ социалон рæзты министр Абайты Юри, РЦИ-Аланийы национ политикæ æмæ æддагон бастдзинæдты министр Бæгъиаты Алан, РЦИ-Аланийы архивон службæйы разамонæг Хайманты Барис, РЦИ-Аланийы хæсты ветеранты комитеты сæрдар Азиаты Алыксандр, РЦИ-Аланийы Фæсивæды хъуыддæгты фæдыл комитеты сæрдар Джусойты Руслан, нæ республикæйы кадетты скъолайы æмæ 5-æм училищæйы æнæнхъæлæджы цауты хайады ахуырдзаутæ. Фестивалы нысантæ сты рæзгæ фæлтæрæн бæлвырд æмæ биноныг радзурын, Ирыстон Уæрæсейы сæраппонд æппæт хæстытæ æмæ быцæуты дæр сæрæнæй кæй архайдта, æмæ та абон дæр, Украинæйы цы сæрмагонд æфсæддон операци цæуы, уым иннæтимæ уæхски-уæхск стыр æнæмæлгæ сгуыхтдзинæдтæ кæй æвдисынц, ирон хъæбатыр фæсивæды нæмттæ та фыдыбæстæйаг хæстон историйы сыгъзæрин дамгъæтæй фыст кæй æрцыдысты, уыцы цаутæ æмæ хабæртты æцæгдзинад кæстæртæн равдисын æмæ радзурын.
Мадзал байгом кодта æмæ нæ республикæйы хъæбатыр фæлтæры сгуыхтдзинæдты фæдыл радзырдта Азиаты Алыксандр. Йæ ныхас райдыдта Фыдыбæстæйы Стыр хæсты цаутæй, ома, абон историон æцæгдзинад иуæй-иу æнæзонд адæймæгтæ кæйдæр пайдайæн зыгъуыммæ куыд фæлдахынц æмæ сын сæ митæн кæрон кæй хъæуы скæнын.
– Ирон адæм кæддæриддæр хæстон намысæй хайджын уыдысты. Уæрæсейы сконды цы бонæй стæм, уæдæй фæстæмæ æнувыд æмæ рæстæй службæ кæнæм нæ паддзахады хæрзæбонæн. Махæй фылдæр хъайтартæ кæцы иннæ адæммæ ис? Уыцы фæлтæр Фыдыбæстæйы Стыр хæсты цы фæндæгтыл рацыдысты, уыдон нывæзт сты, таурæгъон чи ссис, ахæм хъæбатыр æмæ æхсардзинады сгуыхтытæй. Сæрмагонд æфсæддон операцийы Уæрæсейы хъæбатыры нæмттæ лæвæрд æрцыдысты Ирыстонæй аст æфсæддонæн. Мæн фæнды, цæмæй нæ кæстæр фæсивæд, рæзгæ фæлтæр макуы кæной рох, сæрибар цард нын чи ратта æмæ та абон дæр дарддæр йæ туг хæсты быдыры чи калы, уыцы хъæбатырты нæмттæ æмæ хæстон намыс, – загъта Азийы-фырт.
Фестивалы фыццаг бон арæзт цыдис æмныхасы бындурыл. Абайты Юри, Бæгъиаты Алан, Беджызты Роберт дзуаппытæ лæвæрдтой ахуырдзауты фарстытæн, дзырдтой сæрмагонд æфсæддон операцийы ахадындзинадыл, патриотизм цы у, фидæн куыд аразгæ у, æппæт уыцы хабæрттыл. Абайты Юри куыд радзырдта, афтæмæй министры бынаты йæхи никуы уыдта, фæлæ йын бахæс кодтой, æмæ хæстоны удыхъæд та афтæ арæзт у, æмæ дæ Фыдыбæстæ кæдæм снысан кæна, уырдæм æнæ иу ныхасæй хъуамæ ацæуай, афтæ рауад æрыгон хæстоны дарддæры хъысмæт дæр.
– Никуы уыдтæн æнхъæл, æмæ мæ фæллой æмæ социалон рæзты министрæй снысан кæндзысты. Æз хæстон лæг дæн æмæ ахуыр дæн тызмæг уавæртыл, къæрцхъус уæвыныл, Фыдыбæстæйы сæраппонд хи цардыл дæр нæ хъуыды кæныныл, кæддæр æз дæр мæнæ ацы кæстæрты бынаты уыдтæн æмæ мын уыдис, фидар дзырд æмæ фæтк чи домдта, ахæм ахуыргæнджытæ æмæ ныййарджытæ. Уыдон мын бахастой мæ уд æмæ зондмæ тыхджын уæвын æмæ Фыдыбæстæ зæрдæйы арфæй уарзыны миниу-
джытæ, æмæ сæ дæн абон дæр бузныг, – загъта хъæбатыр хæстон.
Фестивалы иннæ бонты архайджытæн фембæлд уыдзæн æфсæддон журналисттимæ, абон тохы быдыры æдæрсгæйæ, тæссаг уавæрты нæ бæстæйы адæмæн хæсты цаутæ æргом æмæ æцæгæй куыд сты, уыцы хабæрттæ чи дзуры, уыцы «военкортæ» Мамсыраты Георги, Елизаветæ Пиворович, Ани Унанянимæ. Уымæй уæлдай, æвдыст цæудзысты, сæрмагонд æфсæддон операцийы нæ батальонтæ «Алани» æмæ «Осетия»-йы къордты хъæбатыр архайды фæдыл документалон кинонывтæ. Мадзалы æртыккаг бон та ныхас цæудзæн, нæ республикæйы æппæт районтæ дæр æхсæнадон организаци «Адæмон фронтмæ» куыд æрбангом сты æмæ иумæ кæй архайынц, нæ хæстонтæ æмæ ног фæзуæтты цæрæг адæмтæй бæрнондзинад кæуыл хæссæм,
уыдонæн гуманитарон æххуысы мадзæлттыл.
Саутæты Тамилæ,
къам систа Татьянæ
Шеходанова
