Паддзахадон автомобилон инспекцийы кусджытæ дарддæр æххæст кæнынц фæндаггон-транспортон фыдбылызты профилактикæйы мадзæлттæ.
Фæндаггон фæткмæ ахæм цæстдарæн мадзæлтты рæстæг инспектортæ фыццаградон æргом здахынц автобустæ æмæ бæлццæттæласæн æндæр транспорты уавæрмæ.
Ахæм рейдты рæстæг ГАИ-йы инспекторты фарсмæ балæууынц техникон цæстдарды службæйы специалисттæ дæр. Уыцы иумæйаг къордтæ бæстон раиртасынц автобустæ æмæ маршрутон такситы уавæр: бæлццæттæласæн куысты тыххæй хъæугæ гæххæттытæ, хæдтулгæйы техникон æнаипдзинад, зынгхуыссынгæнæнтæ æмæ æндæр техникон фæрæзтæй ифтонгад æмæ афтæ дарддæр.
Уый тыххæй «Рæстдзинад»-æн фехъусын кодтой Паддзахадон автомобилон испекцийы республикон управленийы.
Управленийы пресс-службæйы минæвары ныхасмæ гæсгæ, фæндаггон инспектортæ Дзæуджыхъæуы цы рейдтæ скодтой, æрмæст уыдоны рæстæг цалдæр бонмæ сарæзтой административон æгъдаухæлдтыты тыххæй 30 суагъæйæ фылдæр. Уыцы протоколтæ баст уыдысты хæдтулгæты техникон аипдзинæдтæ æмæ æндæр ахæм æууæлтимæ (кæй зæгъын æй хъæуы, автобустæ æмæ маршрутон такситы хицæуттæ æмæ автотранспортон куыстуæтты разамындæн хæсгонд æрцыд хъуагдзинæдтæ аиуварс кæнын). Уымæй уæлдай, цæстдарæг къордтæ рабæрæг кодтой, фæндаггон змæлды фæтк халыны тыххæй административон ивартæ афойнадыл чи нæ бафыста, ахæм шофырты дæр.
Паддзахадон автомобилон инспекцийы минæвар куыд фæбæрæг кодта, афтæмæй ахæм профилактикон мадзæлттæ дарддæр дæр æххæстгонд цæу-
дзысты сæрмагонд пъланы бындурыл.
Дмитрий АСТАХОВ
