Цæгат Ирыстоны ахадгæ куыст цы нысанмæарæзт программæтыл цæуы, уыдонæй иу у «Хъæууон ахуыргæнæг». Уый фæлгæты ацы аз 10 ахуыргæнæджы сæ куысты бынæттæ раивтой хъæууон скъолатæм.
Уый тыххæй йæ телеграм-каналы ныффыста РЦИ-Аланийы Сæргълæу-уæг Сергей Меняйло.
Ахуырад æмæ наукæйы министрады куыд фæбæрæг кодтой, афтæмæй программæйы архайæг чи сси, уыцы педагогтæн иухаттон паддзахадон æххуысы хуызы лæвæрд æрцыд фæйнæ 1 милуан сомы (уыцы грант алкæцы специалист дæр схардз кæны йæхи фæндонмæ гæсгæ). Хъæууон скъолаты кусын чи райдыдта, уыцы ахуыргæнджыты ’хсæн ис, куыд фæлтæрдджын, афтæ райдайгæ ахуыргæнджытæ дæр.
Уыдонæй иу – Дзукъаты Георги. Ацы æрыгон адæймаг кусын райдыдта Æрыдоны районы Къостайы хъæуы скъолайы математикæйы ахуыргæнæгæй. Георги куыд зæгъы, афтæмæй йын йæ фидæны дæсныйадмæ уарзон-дзинад райгуырын кодта, скъолайы йын физикæйы сусæгдзинæдтæ чи амыдта, уыцы ахуыргæнæг. Уый алкæцы сывæллонмæ дæр рæдау ахаст дардта, йæ предметы вазыгджын хабæрттæ-иу хуымæтæг æвзагæй бæстон бамбарын кодта. Уыцы миниуджытыл æнцой кæны ныр æрыгон математик дæр, сывæллæттимæ кусгæйæ.
Программæ «Хъæууон ахуыргæнæг»-ы сæйрагдæр нысан у хъæууон ахуырады къæпхæн бæрзонддæр кæнын, фæлтæрдджын æмæ æрыгон специалистты разæнгард кæнын чысыл цæрæн бынæтты скъолаты куыстмæ…
Нæ уацхæссæг
