Дзæуджыхъæу æмæ республикæйы хъæууон районты дарддæр кусынц Иумæйаг паддзахадон фæлварæнмæ лæвар цæттæкæнынады центртæ.
Нæ республикæйы сæйраг горæты Кучиты Юрийы уынджы 27-æм скъолайы Иумæйаг паддзахадон фæлварæнмæ цæттæкæнынады центр хистæркъласонты цæттæ кæны æрдзон-наукон къабазы предметтæй – хими æмæ биологийæ. Ныртæккæ ам цæттæ кæнынц горæттæ æмæ районты скъолатæй æрбацæуæг фæндзай ахуырдзауæй фылдæр. Национ проект «Фæсивæд æмæ сывæллæттæ»-йы, стæй регионы Ахуырад æмæ наукæйы министрады æххуысы фæрцы скъоламæ ис хъæугæ лабораторон ифтонггæрзтæ æмæ цæстуынгæ æрмæг хистæркъласонтæн хæрзхъæд ахуырад раттынæн.
Бирæ азты дæргъы фæлварæнтæм ахуырдзауты æнтыстджынæй чи цæттæ кодта, уыцы центры амонынц фæлтæрдджын педагогтæ. Скъоладзаутæ ахуырадон æрмæг цæмæй биноныг рахатой, уымæн чи ахъаз кæны, куыст æххæст кæнгæйæ, педагогтæ пайда кæнынц ахæм размæцыд ахуырадон мадзæлттæй.
– Горæтаг сывæллæттæй фæстæмæ нæм æрбацæуынц Алагиры районы поселок Мызур æмæ Дзæуджыхъæуы микрорайоныл нымад поселок Карцайы цæрæг фæсивæд дæр. Биологи æмæ химийæ сæрмагонд ахуырад чи амоны, педагогтæ æрбацæуæг хистæркъласонтæн бацæттæ кодтой ахуырады ахæм фæтк. Лæппутæ æмæ чызджытæ æнæзивæгæй цæуынц, – зæгъы 27-æм скъолайы директор Джимиты Галинæ.
Иумæйаг паддзахадон фæлварæнмæ цæттæкæнынады центры куысты сæйраг хæс у фæлварæн дæттынмæ хистæркъласонты цæттæкæнынады къæпхæн фæуæлдæр кæнын, фæсивæдæн уæлдæр ахуыргæнæндæттæм æнæкъуылымпыйæ бацæуыны фадат куыд уа, афтæ. Ахуырадон къордмæ хи ныффыссынæн скъоладзауы хæс у хи къласон разамонæгмæ, кæнæ, Фæлварæнмæ цæттæкæнынады центртæ кæм кусынц, ахæм ахуыргæнæндонмæ комкоммæ бахатын. Уымæй уæлдай, (8-8672) 53-49-40 телефонæй регионы Ахуырад æмæ наукæйы министрадмæ фæдзургæйæ, бæлвырд хабæрттæ базонæн ис.
САУТÆТЫ Тамилæ
