Цæгат Ирыстоны прокурор Олег АПАНАСЕВИЧÆН фембæлд уыд сæрмагонд æфсæддон операцийы архайджытæ æмæ сæ бинонтимæ.
Прокуратурæйы минæвæрттимæ фембæлдмæ чи ’рбацыд, уыцы адæмы курдиæттæ баст уыдысты бирæ фарстатимæ: хæстон быцæуты архайæджы статусы тыххæй хъæугæ гæххæттытæ райсынимæ, æбæрæгæй сæфт æфсæддон службæгæнджыты агурынимæ, уæлæмхасæн социалон лæггæдты фæтк æмæ æндæр ахæм хъуыддæгтимæ.
Алкæцы курдиатмæ дæр бæстон каст æрцыд: кæм хъуыд, уым адæймаг юридикон æххуыс райста, бынаты алыг кæнæн кæмæн нæ уыд, уыцы хъуыддæгтæм та балæвæрдтой профилон ведомствæтæм… Уыимæ, Прокуратурæйы ’рдыгæй цæстдард уыдзæн, адæмы курдиæтты фæдыл цы уынаффæтæ хаст æрцæуа, уымæ.
Фембæлды архайдтой Дзæуджыхъæуы æфсæддон гарнизоны прокуроры хæстæ æххæстгæнæг Хуыбиаты Денис æмæ федералон фонд «Фыдыбæстæ хъахъхъæнджытæ»-йы цæгатирыстойнаг хайады разамонæджы хæстæ æххæстгæнæг Наталья Кабанова.
РЦИ-Аланийы Прокуратурæйы пресс-службæ
