Фыццаградон национ проекттæ æмæ нысанмæарæзт паддзахадон программæты бындурыл нæ республикæйы бирæ фарстатæ лыггонд цæуы, уæлдайдæр та – æнæниздзинад хъахъхъæнынады къабазы.
Афтæ, 2025 азы программæ «Æнæниздзинад хъахъхъæнынады къабазы фыццаградон медицинон æххуысы системæйы модернизаци»-йы фæлгæты бындурон цалцæ-
джы куыстытæ æххæстгонд цыдысты Дзæуджыхъæуы цалдæр поликлиникæйы. Абоны онг бындурон рацарæзты куыстытæ кæм ахицæн сты, уыцы медицинон кусæндæттæй иу у горæты 4-æм поликлиникæйы филиал З. Космодемьянскаяйы уынджы.
Знон медицинон кусæндон бабæрæг кодта РЦИ-Аланийы Сæргълæууæг Сергей Меняйло. Регионы разамонæг аргъ скодта, подрядон организацийы минæвæрттæ сæ хæстæ куыд сæххæст кодтой, уымæн.
50 азы дæргъы поликлиникæйы бæстыхай баййæфта æрмæстдæр уæлæнгай цалцæг, кусæнуæттæ æмæ лабораторитæ абоны домæнтæн дзуапп нал лæвæрдтой…
Ныр – йе ‘ддаг бакастæй райдай æмæ мидæггаг фæзуæттæй фæу – ног «джиппы уагъдæй» агæпп кодта поликлиникæ. Афæдзы æмгъуыдмæ аразджытæ бацархайдтой медицинон кусæндон бындуронæй рацаразыныл. Æмæ уыцы нысан сæ къухы бафтыд – поликлиникæйы кусджытæн сарæзтой æппæт æмбæлгæ уавæртæ дæр. Уыимæ, медицинон кусæндоны æвæрд æрцыдысты хъæугæ техникон фæрæзтæ дæр.
Бындурон цалцæджы фæстæ поликлиникæ байгом кæныны фæдыл кадджын æмбырдмæ æрбацыдысты РЦИ-Аланийы Хицауады Сæрдары хæдивæг Александр Реутов, республикæйы æнæниздзинад хъахъхъæнынады министр Митциты Астан æмæ иннæ бæрнон кусджытæ. Уыдон республикæйы Сæргълæууæгимæ æрзылдысты поликлиникæйы бæстыхæйттыл, федтой ног техникæйæ ифтонггонд кабинеттæ, аныхас кодтой дохтыртæ æмæ иннæ специалисттимæ.
Сергей Меняйло разыйæ баззад подрядон организацийы минæвæртты архайдæй. Бæрнон кусджытæ куыд радзырдтой, афтæмæй поликлиникæйы фæфылдæр медицинон кабинетты нымæц, стæй, рынчынты уавæрмæ чи кæсы, уыцы дохтырты нымæц дæр. Ныр æххуысхъуаг адæмæн поликлиникæйы филиалы ис зæрдæзæгъгæ фадæттæ æмбæлгæ æмвæзадыл медицинон лæггæдтæ райсынæн…
Саутæты Тамилæ, къамтæ систа
Татьяна Шеходанова
