Раздæр куыд хъусын кодтам, афтæмæй Цæгат Ирыстоны дарддæр æххæстгонд цæуы регионалон программæ «Æхсарджын Ирыстон». Программæйы архайджытæ, 32 адæймаджы, сты сæрмагонд æфсæддон операцийы ветерантæ.
Программæ арæзт æрцыдис РЦИ-Аланийы Сæргълæууæг Сергей Меняйлойы хъæппæрисæй федералон проект «Хъæбатырты рæстæг»-ы фæлгæты. Ахуырты программæ цæудзæн афæдзы дæргъы. Уый фæстæ йæ архайджытæн уыдзæн хицаудзинады регионалон æмæ муниципалон оргæнты, стæй, æхсæнадон иугæндты кусгæйæ, сæ зонындзинæдтæ æмæ фæлтæрддзинад равдисыны фадат. Ныртæккæ цæуынц æртыккаг къæпхæны ахуыртæ. Фидæны разамонæг кусджытæн лекцитæ æмæ семинартæ кæсынц хицаудзинады паддзахадон æмæ муниципалон оргæнты кусджытæ, министртæ æмæ æндæр специалисттæ.
Мах фембæлдыстæм регионалон программæ «Æхсарджын Ирыстон»-ы куратор, Паддзахадон разамынды уæлдæр скъолайы сæрмагонд программæты академион директор Надежда Кононенкоимæ. Уый нын радзырдта программæйы нысанты тыххæй, сæрмагонд æфсæддон операцийы архайджытимæ цавæр куыст цæуы, цæмæй фидæны нæ республикæйы хорздзинадыл архайой.
– 9 февралы мах райдыдтам æххæст кæнын программæйы æртыккаг къæпхæн. Уырдæм хауынц регионалон æмæ муниципалон разамынды фарстатæ. Къуырийы дæргъы йæ архайджытæ æркастысты муниципалон разамынд æмæ цæрджытимæ æмахасты хицæндзинæдтæм, регионы социалон æххуысады фарстатæм. Уый фæлгæты программæйы архайджытæ бабæрæг кæндзысты æнæниздзинад хъахъхъæнынады, культурæйы, социалон æмæ спортивон къабазы уагдæттæ æмæ ма регионы разамынды центр. Лекцитæ сын кæсдзысты Уæрæсейы Федерацийы цур паддзахадон хицаудзинады Уæлдæр скъолайы минæвæрттæ. Программæйы кæронбæттæны архайджытæ дарддæр дæр стажировкæ кæндзысты республикон хицаудзинады оргæнты, – радзырдта уый.
Надежда Кононенко ма фæбæрæг кодта, программæйы архайджытæ ныртæккæ сты стажертæ, дарддæр регионалон æмæ муниципалон риссаг фарстатæ чи лыг кæндзæн, уыдон.
– Мах фæнды, цæмæй ныр, ахуырты рæстæг, программæйы архайджытæ саразой ахæм проекттæ, уый фæстæ царды, бынæтты кусгæйæ, кæмæй спайда кæндзысты. Уыдон хъуамæ зоной, регионы цавæр лыггæнинаг фарстатæ æмæ хицæндзинæдтæ ис, уый, – бафтыдта ма йæ ныхасыл программæйы куратор.
«Æхсарджын Ирыстон»-ы архайджыты цæттæ кæнынц канд республикон разамонæг специалисттæ нæ, фæлæ районты муниципалон разамонæг кусджытæ дæр. Сæ размæ цы стыр нысантæ æвæрд ис, уыдон баст сты æнæниздзинад, хъæууон хæдзарад, культурæ æмæ республикæйы царды алы фарстатимæ.
ХЪОЙБАЙТЫ Галинæ
