Хуссар Ирыстоны Президент Гаглойты Алан фембæлд РЦИ-Аланийы официалон минæвар Хъырымы Республикæ æмæ федералон ахадын-
дзинадимæ горæт Севастополы Саулаты Валери æмæ æхсæнадон змæлд «Ирæтты уæлдæр совет»-ы уæнгтимæ. Цæгатирыстойнæгтæ Цхинвалы сæмбæлдысты цæлхæмбырды бацархайыны тыххæй.
Ацы ахсджиаг фембæлды архайдта Хуссар Ирыстоны æртыккаг Президент Тыбылты Леонид, ныртæккæ хуссарирыстойнæгты «Ирæтты уæлдæр совет»-ы хайады сæрдар. Гаглойты Алан куыд фæбæрæг кодта, афтæмæй арæх ныхас кæны Тыбылты Леонидимæ, хъуыдыты сæ æфтауы нырыккон, тагъд ивгæ дуне. «Хистæрты фæрсын кæддæриддæр ирæттæм растыл нымад уыд, æхсæнадон змæлд хистæртæ хорз æнкъарынц, раттынц æмбæлгæ уынаффæтæ», – загъта Гаглойы-фырт.
Хуссар Ирыстоны Президент куыд радзырдта, афтæмæй Цхинвалы сæмбæлдысты цæлхæмбырды фæдыл. «Уæрæсейы Президенты уынаффæйæ 2026 аз нымад æрцыд Уæрæсейы адæмты иудзинады азыл. Йæ нысан у адæмты ‘хсæн национ иу-
дзинад, æнгомдзинад, сабырдзинад æмæ разыдзинад сфидар кæнын. Мах та стæм Уырыссаг дунейы хай, æмæ нæ фидæн уынæм Уæрæсеимæ. Стæм æфцæ-
джы фæйнæ фæрсты цæрæг иу адæм, нæ Райгуырæн бæстæ дыууæ дихы нæ кæнæм», – фæбæрæг кодта Президент.
Тыбылты Леониды ныхасмæ гæсгæ, æрыгон республикæмæ æнхъæлмæ кæсынц стыр æнтыстытæ. «Æхсæнадон змæлд æвзары алыхуызон фарстатæ, тыхстдзинæдтæ. Нæ цæгатаг æфсымæртæ æппынæдзух нæ фарсмæ сты, се ‘ххуыс сын æнкъарæм, нæ уæлахизтыл нын цин кæнынц», – радзырдта Тыбылы-фырт.
Ахæм зæрдæбын фембæлды тыххæй Саулаты Валери бузныг загъта фысымтæн. Йæ ныхасмæ гæсгæ, ныр 43 азы цæры Хъырымы, фæлæ йæ зæрдæ та кæддæриддæр Ирыстоны ис.
Саулайы-фырт куыд бахахх кодта, афтæмæй алцыдæр аразынц, цæмæй адæмты ‘хсæн уа иудзинад æмæ æнгомдзинад. РЦИ-Аланийы официалон минæвар Хъырымы Республикæйы Гаглойты Аланæн ратта, æдасдзинады службæты – «ВЧК КГБ ФСБ-Дзержинскийы майдан», йе ‘хсæнадон куысты та бæрнон æмæ быхсон куыд уа, уыцы арфæтæ йын ракодта. Фембæлды кæрон уазджытæ Гаглойы-фырты къухæй райстой «Хуссар Ирыстоны 35 азы тыххæй» майдантæ.
Уый фæстæ уазджытæ æмæ фысымтæ æрбадтысты цæлхæмбырды. Йæ архайджытæ уыдысты наукæйы, æхсæнады, сфæлдыстады, фæсивæды минæвæрттæ. Хуссар Ирыстоны Президенты паддзахадон уынаффæгæнæг Беджызты Батрадз паддзахады разамонæджы номæй бакаст арфæйы фыстæг. Парти «Иудзинад»-ы сæрдар Кокойты Зураб куыд радзырдта, афтæмæй цæлхæмбырдæн историон æмæ культурон ахадындзинадæй уæлдай, ис ноджы вазыгджындæр бындуртæ.
«Нæ абон æмæ нæ фидæн цавæр уыдзысты, ууыл хъуамæ ‘рдзурæм. Ирыстоны кой скæнгæйæ, зонæм, æнусты дæргъы Уæрæсейы Федерацийы бирæнацион адæмы иу хай кæй у, уый. Æрмæст иумæйаг арæн нæ нæ баиу кодта, фæлæ иумæйаг истори. Нæ тых нæ иудзинады кæй ис, уыцы ныхас дзаг у бирæвæрсыг хъуыдытæй», – загъта Кокойы-фырт. Цæлхæмбырды нысан у адæмыхæттыты ‘хсæн нывыл ахастытæ, хæлардзинад фидар кæнын. Хъуыддаг бантыст политикон парти «Иудзинад»-ы
руаджы, политикон парти «Ныхас»-ы архайдæй.
РЦИ-Аланийы Сæргълæууæг æмæ Хицауады Администрацийы бæрнон кусæг Бигъуылаты Людмилæ йæ раныхасы куыд загъта, афтæмæй Цæгат æмæ Хуссар Ирыстон сты иу адæм, æрбаиу сæ кодтой иумæйаг истори, культурæ, традицитæ, дарддæры рæзтæн хорз ахъаз фæуыдзæн æмгуыстад. «Ныртæккæ ахæм регионтæ нал ис, æмæ дзы æрмæст иунæг адæмыхатт цæра. Фæлæ тыхджындæр уымæй стæм. Нæ кæстæрты иумæ хъомыл кæнæм, иумæ у нæ фæллой дæр, кусæм, патриотон хъомылад æххæст кæнæм. Æппæт уыдæтты ис адæмы тых», – загъта Бигъуылаты Людмилæ.
(Информацион агентад «Рес»)
