Ацы бонты Дзæуджыхъæуы кусæг балцы уыд Физикæ æмæ математикæйы федералон национ центры наукон разамонæг Александр СЕРГЕЕВ. Амынд наукон-иртасæн центр æмæ Цæгат Ирыстоны ахуырадон æмæ зонадон структурæты æмархайд æнгомдæр кæныны фарстатыл ныхас рауад, республикæйы уазæг æмæ РЦИ-Аланийы Сæргълæууæг Сергей МЕНЯЙЛОЙÆН цы фембæлд уыд, уым.
Ныхасы архайæг уыдысты Цæгат Ирыстоны Хетæгкаты Къостайы номыл паддзахадон университеты ректор Огъуаты Алан, Физикæ æмæ математикæйы федералон национ центры наукон разамонæджы хæдивæг Райфæ Биткова æмæ амынд центры наукон разамонæджы аппараты сæргълæууæг Валерия Белянина.
Фембæлды райдайæны Сергей Меняйло уазджытæн бузныг загъта, респуб-
ликæимæ æмгуыстадмæ цымыдисдзинад кæй æвдисынц, иумæйаг ахуырадон-зонадон проекттыл бакусынмæ цæттæ кæй сты, уый тыххæй.
– Цæгат Ирыстонмæ хорз хъомыс ис ахуырад æмæ наукæйы къабæзты, æмæ йæ дарддæры райрæзтыл дæр куыст цæуы. Республикæйы цы физикон-математикон скъола ис, уый хъарутæ, мæнмæ гæсгæ, амонынц, цæмæй уыцы кусæндон фидæны суа наукон кадртæ цæттæ кæныны куырдадз. Абон нæ размæ цы ахадгæ нысантæ ис, уыдоны ахсджиагдæртæй иу у, наукæмæ цымыдисдзинад чи ’вдисы, иртасæн куыстыл æнувыд чи у, ахæм курдиатджын фæсивæды раргом кæнын æмæ йын йæ аккаг ахуырадæн æмæ дарддæры райрæзтæн æмбæлгæ фадæттæ аразын, – загъта республикæйы Сæргълæууæг.
Ацы æмæ иннæ хъуыдытыл разыдзинад равдыста Александр Сергеев дæр. Уый бæстон радзырдта, ацы бонты йын Дзæуджыхъæуы цы фембæлдтытæ уыд, уыдоны тыххæй. Йæ ныхасмæ гæсгæ, пайдайаг ныхас ын рауад, наукон-иртасæн куысты къабазы фыццаг къахдзæфтæ чи кæны, республикæйы уыцы фæсивæды къордимæ.
– Фыццаг бакастæй дæр бæрæг у, республикæйы æрыгон фæлтæр куыстхъом кæй сты, уый. Кæй зæгъын æй хъæуы, абоны уавæрты уæлдай вазыгджындæр у, хæстæгдæр фидæны наукæйы хъомысыл чи бафтаудзæн, цардархайды æппæт къабæзты нывыладæн ахъаз чи фæуыдзæн, ахæм нырыккон æмæ пайдайаг проекттæ равзарын æмæ сыл иумæйаг тыхтæй бакусын. Ахæм æмархайдмæ мах стæм цæттæ. Æппæт амынд фарстатыл нæ центр æнгом æмгуыстад кæны дæсгай раззагдæр университет æмæ наукон-иртасæн организацитимæ. Æхсызгон мын уыдзæн, уыцы иумæйаг куысты зæрдиаг архайджытæ цæгатирыстойнаг фæсивæды минæвæрттæ дæр куы суой, уæд, – бафиппайдта Александр Сергеев.
Ныхасы архайджытæ хатдзæгтæ скодтой, мæскуыйаг делегацийы уæнгтæн Дзæуджыхъæуы наукон центры, Цæгат Ирыстоны гуманитарон æмæ социалон иртасæнты институт æмæ Хетæгкаты Къостайы номыл паддзахадон университеты минæвæрттимæ цы фембæлдтытæ уыд, уыдонæн дæр.
РЦИ-Аланийы
Сæргълæууæг
æмæ Хицауады
пресс-службæ
