Организациты зилдух (хи рауагъд товарты, æххæстгонд куыстытæ æмæ лæггæдты аргъ, стæй æндæр рæттæй ласт уæйгонд товарты аргъ) 2025 азы январь-декабры рауад 268296,0 милуан сомы, ныры æргътæй – 107,3 проценты, 2024 азы уыцы рæстæгимæ абаргæйæ.
Промышленнон куыстады индекс 2025 азы январь-декабры рауад 80,8 проценты, 2024 азы уыцы рæстæгимæ абаргæйæ.
Пайдаджын къахæггæгты æфтиæгты куыстады индекс рауад 104,1 проценты, æрдзон змис æмæ чъырдуры куыстады гуырахст кæй фæфылдæр, уый фæрцы.
Хомаггуыстгæнæг индустрийы куыстады индекс ивгъуыд рæстæгмæ рауад 81,8 проценты, уый уымæн, æмæ сæ куыстад кæй фæкъаддæр: æрдæггуыстгонд дзидзайæн — 7,1 проценты, æхсырæн – 6,7 проценты, урсаг æмæ царвæн – 55,8 проценты, цыхтытæн – 6,6 проценты, къæдорæн – 37,4 проценты, туагæхсыры продукцийæн – 26,9 проценты, спъиртæн – 27,8 проценты, минералон дæттæн – 7,4 проценты, спъирт кæм нæй, нуазыны ахæм дæттæн – 10,2 проценты, сæрмагонд уæлæдарæсæн – 22,8 проценты, полимерон цъарæн – 5,3 проценты, æвгтæн – 23,6 проценты, керамикон агуыридурæн – 2,5 проценты, æндæр прибортæн – 11,2 проценты.
Уыцы иу рæстæг фæфылдæр: къалбасты рауагъд – 14,0 проценты, сæлдæджы рауагъд – 5,7 проценты, дзулы хæринæгты рауагъд – 5,1 проценты, кондитерон хæринæгты рауагъд – 17,8 проценты, водкæйы рауагъд – 40,0 проценты, сæнтæ æмæ шампайнаг сæнты рауагъд – 12,4 проценты, бæгæныйы рауагъд – 15,5 проценты, арæзтадон æрмæджыты рауагъд – 79,1 проценты, асфальты рауагъд – 14,1 проценты.
Электрон тых æмæ газы æфсисад; бæстыхæйттæм, транспорт æмæ æндæр æхгæд бынæттæм сыгъдæг уæлдæф хæццæ кæныны куыст. 2025 азы январь-декабры, ивгъуыд азы уыцы рæстæгимæ абаргæйæ, куыстады индекс рауад 109,0 проценты. Электрон тыхы бакуыст фæфылдæр 13,9 проценты, хъарм тыхы бакуыст та фæкъаддæр 13,8 проценты.
Донуадзæнтæ; донсыгъдæггæнæнтæ; бырон æвзарын æмæ йæ ласыны куыстады индекс 2025 азы январь-декабры рауад 55,5 проценты, ивгъуыд азы уыцы рæстæгимæ абаргæйæ.
«Арæзтад»-ы куыстыты гуырахст 2025 азы январь-декабры рауад 35488,1 милуан сомы аргъ, кæнæ та æргътæм гæсгæ 102,0 проценты (2024 азы уыцы рæстæджы уыд 106,9 проценты).
Цæрæнуæттæ 2025 азы январь-декабры арæзт æрцыд 7,8 проценты къаддæр, 2024 азы уыцы рæстæгимæ абаргæйæ, æмæ рауад 471291 квадратон метры, уыдонæй 51,1 проценты – хи цæрæн бынæтты арæзтад.
Хъæууонхæдзарадон продукцийы гуырахст развæлгъау бæрæггæнæнтæм гæсгæ 2025 азы январь-декабры фæкъаддæр æмæ рауад 59229,7 милуан сомы, кæнæ та, 2024 азы уыцы рæстæгимæ абаргæйæ, 93,2 проценты. Хоры, стæй хор æмæ хъæдуры культурты куыстад, 2024 азимæ абаргæйæ, 7,3 проценты фæкъаддæр. Картофы куыстад дæр фæкъаддæр 19,1 проценты. Уый хыгъд халсартæ æрæмбырд кодтой 21,5 проценты фылдæр, ивгъуыд азы уыцы рæстæгимæ абаргæйæ.
2025 азы кæронмæ цы нымæцтæ уыд, уыдонмæ гæсгæ фосдарынады
куыстгæнджытæм, æмткæй райсгæйæ, уыд стурвосы 89,1 мин сæры (æндæр-
азимæ абаргæйæ, 7,5 проценты къаддæр), уыдонæй хъуццытæ – 34,4 мин сæры (16,1 проценты къаддæр), хуытæ – 5,0 мин сæры (38,0 проценты къаддæр), фыстæ æмæ сæгътæ – 61,6 мин сæры (23,5 проценты къаддæр), кæрчытæ – 928,2 мин сæры (9,9 проценты къаддæр).
Хъæууонхæдзарадон куыстгæнджытæ, æмтгæй райсгæйæ, цы æхсыр ра-
уагътой, уый гуырахст фæкъаддæр 9,0 проценты, æйчыты куыстады гуырахст та фæфылдæр 53,3 проценты.
Автомобилон транспортæй уæзæгтæ ласыны зилдух 2025 азы январь-декабры развæлгъау бæрæггæнæнтæм гæсгæ рауад 104,2 проценты, бæлццæттæ ласыны зилдух – 82,6 проценты.
Розницæйы базарады зилдух 2025 азы январь-декабры рауад 215792,9 милуан сомы, кæнæ та 103,8 проценты (2024 азы январь-декабры уыд 104,6 проценты). Базарады æдде чи архайы, базаргæнæг уыцы организациты æмæ хигуыстгæнæг уыцы амалхъомты куыстыты гуырахст фæфылдæр 4,7 проценты, розницæйы базарад æмæ армукъаты товартæ уæй кæныны гуырахст та фæфылдæр 1,4 проценты.
Æхсæнадон хæлцады зилдух 2025 азы январь-декабры рауад 11394,7 милуан сомы, кæнæ та 109,2 проценты.
Товартæ стыр бæрцытæй уæй кæныны базарады зилдух 2025 азы январь-декабры развæлгъау бæрæггæнæнтæм гæсгæ рауад 76545,7 милуан сомы, кæнæ та 84,0 проценты, уыцы рæстæгимæ абаргæйæ.
Æхца фидын кæмæн хъæуы, адæмæн ахæм лæггæдты гуырахст 2025 азы январь-декабры рауад 46474,4 милуан сомы, æндæразы уыцы рæстæгимæ абаргæйæ, 5,6 проценты фылдæр.
Товартæ æмæ лæггæдты фæлхасадон æргътæ 2025 азы кæронмæ фæфылдæр сты 6,1 проценты, 2024 азы кæронмæ æргътæ цас фæфылдæр сты, уымæй; уыимæ, æнæхойраджы товартæ фæфылдæр сты 4,2 процентæй, лæггæдтæ – 9,3 процентæй, хойраджы товартæ – 6,0 процентæй.
РЦИ-Аланийы Финансты министрады бæрæггæнæнтæм гæсгæ республикæйы бюджет 2025 азы январь-декабры æххæстгонд æрцыд кадаваримæ (-1207,7 милуан сомы); 2024 азы январь-декабры бюджет та уыд æфтиагджын (1693,9 милуан сомы).
Организациты финансон архайды бæрæггæнæнтæ 2025 азы январь-декабры сты æвæрццæг æмæ рауадысты 998,9 милуан сомы. Организацитæй зианхæссæг чи у, уыдоны бæрц, 2024 азы уыцы рæстæгимæ абаргæйæ, 6,1 хатты фæкъаддæр æмæ рауад 42,7 проценты.
Мæйы рæстæмбис мызд 2025 азы январь-декабры рауад 51735,3 сомы, 2024 азы уыцы рæстæгимæ абаргæйæ, 13,1 проценты фылдæр.
2026 азы 1 январмæ йæ бæрæггæнæнтæ цы куыстуæттæ æрбарвыстой, уыдон мызд фидынæй хæстæ нæ дарынц.
2025 азы кæронмæ официалон æгъдауæй æгуыстыл нымад æрцыд æмæ РЦИ-Аланийы Адæмæн куыст дæттыны комитеты хыгъды ис 2289 адæймаджы, уыдонæй 1890 адæймаджы уæдмæ дæр уыдысты æгуыстыл нымад, уый у 16,9 проценты фылдæр, 2024 азы уыцы рæстæгимæ абаргæйæ. Официалон æгъдауæй чи сбæрæг, æгуыстдзинады уыцы æмвæзад 2025 азы кæронмæ рауад куыстхъом адæмæн сæ 0,6 проценты (æндæразы уыцы рæстæджы бæрæггæнæн уыд 0,5 проценты).
Паддзахадон
статистикæйы
федералон службæйы управлени Цæгат
Кавказы федералон зылды
