Бинонты физкультурон-дзæбæхгæнæн комплекс «Физикон» байгом знон Дзæуджыхъæуы. Объект арæзт цыд федералон проект «Бизнес-Спринт»-ы паддзахадон программæ «Æз æвзарын спорт»-ы бындурыл ООО «Подкова», РЦИ-Аланийы Хицауады хъæппæрис æмæ Уæрæсейы Федерацийы Спорты министрады ‘ххуысæй.
Комплекс у канд Ирыстоны нæ, фæлæ æнæхъæн Цæгат Кавказы дæр фыццаг. Ацы ран ис уæрæх фадæттæ æгас бинонтæн дæр се ‘нæниздзинад дзæбæх кæнынæн. Мадзалмæ æрбацыдысты: РЦИ-Аланийы Хицауады Сæрдар Дзанайты Барис, УФ-йы спорты министры хæдивæг Мгер Гандилян, РЦИ-Аланийы спорты министр Фрайты Сослан, амалхъом Бердыты Вадим, уæгъдибар хъæбысхæсты чемпионтæ Найфонты Артур, Сидахъаты Зауырбег, Рæмонты Сослан, Тменаты Тамерлан æмæ РЦИ-Аланийы спорты министры хæдивæг Санаты Аидæ. Уазджытæн комп-
лексы кусджытæ сарæзтой экскурси бæстыхайы залтыл. Ис дзы сывæллæттæ, нæлгоймæгтæ æмæ сылгоймæгтæн хицæн хатæнтæ уæлæдарæс раивынæн, бассейнтæ, сывæллæттæн хъазæн фæзтæ æмæ хиирхæфсæн агъуыстытæ, физикон цæттæдзинады, медицинон æмæ массажгæнæн кабинеттæ, тренажертæ æмæ конференцитæ аразæн залтæ, стæй къофицымæн хатæн. Абоны онг комплексы хи дзæбæх кæнынмæ сæхи ныффыстой 1150 адæймаджы. Бæстыхайыл экскурсийы фæстæ УФ-йы спорты министры хæдивæг Мгер Гандилян куыд радзырдта, афтæмæй ацы проектыл ныхас цыд 2022 азы, йæ арæзтад та райдыдта 2023 азы æмæ кæронмæ фæцис 2025 азы.
– Ахæм объекттæ тынг ахсджиаг æмæ вазыгджын сты адæмы æнæниздзинад фидардæр кæнынæн. Кæд нæ бæстæйы æдæппæтæй цалдæр йеддæмæ не сты, уæд ацы проект дарддæр æххæстгонд цæудзæн Уæрæсейы иннæ регионты дæр, – загъта Мгер Гандилян.
Дзанайты Барис та радзырдта, Цæгат Ирыстон спорты бæстæ кæй у, æмæ спорты инфраструктурæйы рæзтыл архайд дæр нæ республикæйы цæуы.
– Паддзахадон проекты фæлгæты бирæ фарстатæ лыггонд цæуы Ирыстоны. Абон æвдисæн цы комплексæн стæм, уый канд хæрзвадат нæу, фæлæ спортсментæн дæр ахъаззаджы мадзал се ‘нæниздзинад фидардæр кæнынæн æмæ адæмы царды уавæртæ нырыккон стандарттæм гæсгæ хæрзхъæддæр кæнын, – загъта Дзанайы-фырт.
Дзæбæхгæнæн комплексы ном «Физикон» дæр иронау æвзæрст, æвæццæгæн, хуымæтæджы не ‘рцыд. Цы ног закъон рацыд 1 мартъийæ фæстæмæ, уый домы, нæ бæстæйы æппæт æхсæнадон æмæ социалон объектты нæмттæ иууылдæр уырыссагау фыст куыд æрцæуой, национ регионты та – уырыссаг æмæ сæхи мадæлон æвзæгтыл.
Саутæты Тамилæ
