Республикæйы Сæргълæууæг Сергей МЕНЯЙЛО амыдта РЦИ-Аланийы Хицауады радон æрвылкъуырион аппаратон æмбырд. Ныхас дзы цыд республикæйы экономикон æмæ социалон рæзты ахсджиаг фарстатыл. Архайдтой дзы министрадтæ æмæ ведомствæты разамонджытæ, районты хиуынаффæйады администрациты сæргълæуджытæ.
Хицауады Сæрдары хæдивæг Томайты Ирбег йæ раныхасы фехъусын кодта республикæйы оперативон уавæр.
– Республикæйы хæххон районты дарддæр дæр тæссаг у зæйтæ рацæуынæй. Ивгъуыд къуырийы дæргъы æрцыд иу зæйрацыд. Афæдзы райдайæнæй нырмæ респуб-
ликæйы сæхи æгъдауæй рацыдысты 32 митзæйы, хъыгдард дзы ничи баййæфта. Цæгат Ирыстоны сæрмагонд службæтæ архайынц бæрзонд цæттæдзинады уавæрты. 16-22 мартъийы республикæйы æрцыд 13 зынгсирвæзты. Хъыгдард дзы ничи баййæфта. Цæгат Ирыстоны автоинспекцийы хъусынгæнинагмæ гæсгæ, республикæйы фæндæгтыл æрцыд 63 фæндаггон фыдбылызы. Хъыгдард дзы баййæфтой 5 адæймаджы. Боныхъæды уавæртæм гæсгæ Арвыкомы фæндаг æхгæд у автотранспорты æппæт хуызтæн дæр. Транскамы фæндаг гом у автотранспорты æппæт хуызтæн дæр. Республикæйы фæндæгтыл лæууынц 2170 транзитон уæзласæн машинæйы, электронон рады та – 1664. Уæрæсейы Федераци æмæ Гуырдзыстоны арæныл уæлдæр амынд рæстæгмæ дыууæрдæм ахызтысты 11730 автотранспортон иуæджы æмæ 26235 адæймаджы. Боныхъæд кæй фæивта, уый тыххæй дзы архайы хъармгæнæн пункт, – загъта Томайы-фырт.
Республикæйы Мидхъуыддæгты министрады хъусынгæнинагмæ гæсгæ, ивгъуыд къуырийы дæргъы регионы æрцыд 139 фыдракæнды, раргом кæнын дзы бантыст 84. Барадхъахъхъæнæг оргæнтæ сбæрæг кодтой террористон цауы тыххæй мæнг хъусынгæнинаг. Дарддæр цæуынц слестгæнæн куыстытæ.
«Роспотребнадзор»-ы республикон хайады хъусынгæнинагмæ гæсгæ, ивгъуыд къуырийы республикæйы эпидемиологон уавæр уыд нывыл. Ног коронавирусон инфекци разынд 8 адæймагмæ.
РЦИ-Аланийы ахуырад æмæ наукæйы министр Алыбегты Эллæ куыд фехъусын кодта, афтæмæй республикæйы грипп æмæ ОРВИ-йы аххосæй æхгæд æрцыдысты фондз рæвдауæндоны. Рæвдауæндæтты рынчын сывæллæтты нымæц у 12, скъолаты та – 10 проценты.
– 1 апрелæй 2026-2027 ахуыры азмæ 1-æм кълæстæм райдайдзыстæм курдиæттæ исын. Уыдон ист цæудзысты дыууæ къæпхæнæй: фыццаг ацæудзæн 1 апрелæй 30 июнмæ – скъоламæ цы алфамбылай хауы, уым цæрæг сывæллæттæн, стæй, Уæрæсейы Федерацийы закъонады бындурыл фыццаградон бар кæмæ ис, уыдонæн. Дыккаг къæпхæны ист цæудзысты иннæ сывæллæттæ, скъолайы ма уæгъд бынæттæ куы уа, уæд, – фæбæрæг кодта министр.
Республикæйы æнæниздзинад хъахъхъæнынады министр Митциты Астаны ныхасмæ гæсгæ, Республикон клиникон рынчындоны фыццаг хатт цæуы адæймагæн йæ уырг доноры уыргæй баивыны операци.
Сергей Меняйло Æнæниздзинад хъахъхъæнынады министрæн бафæдзæхста алы поликлиникæйы дæр гемодиализ æмæ стоматологон кабинеттæ байгом кæныны хъуыддаг фæтагъддæр кæнын.
– Æз частникты ныхмæ нæ дæн, фæлæ хъуамæ гемодиализ æмæ стоматологон паддзахадон кабинеттæ кусой, цæмæй медицинон полисмæ гæсгæ адæмæн лæвар æххуыс кæной, – загъта регионы разамонæг.
Сергей Меняйло ма бахаста фæндон ацы аз «Æнæмæлгæ полкъ» саразын. Бæлвырддæр бæрæг уыдзæн, 9 Маймæ хæстæг уавæртæ куыд амоной, уымæ гæсгæ. Ноджы ма республикæйы Сæргълæууæг бафæдзæхста акци «Посмотри на их лица» нывыл уагыл саразын: адæм рады куыд нæ лæууой, æмæ æхца бафидыны кой куыд никæмæ уа, афтæ.
Æмбырды ма ныхас цыд æндæр ахсджиаг фарстатыл дæр.
ХЪОЙБАЙТЫ Галинæ
