Проект «Технологон æфсисад хойраджы æдасдзинадæн»-ы сæйраг хæс у, Уæрæсейы хъæууонхæдзарадон комплексы рæзт æмæ технологон хæдбардзинад. Йæ фæрцы нæм фаг уыдзæн æппæт æнæмæнгхъæугæ продукттæ, стæй фылдæр гæнæнтæ фæзындзæн дунеон базарады нæ уавæр фидардæр кæнынæн. Сноггонд национ проекттæ Уæрæсейы Президенты уынаффæмæ гæсгæ, царды æххæстгонд цæуынц фаронæй фæстæмæ.
Хæххон аграрон университеты студенткæ Бутаты Кристинæйы æрхъуыдыгонд цыхт дзуапп дæтты национ проектæн «Технологон æфсисад хойраджы æдасдзинадæн». Уый фæдыл фехъусын кодтой Цæгат Ирыстоны Хъæууон хæдзарады министрады.
Республикæйы уæлдæр хъæууонхæдзарадон ахуыргæнæндоны студенткæ зæрдиагæй бакуыста зайæгойтимæ æвæджиауы фæлмæн цыхт скæныныл æмæ йæ къухы æфтгæ дæр бакодта. Промышленнон уавæрты урсаджы фыццаг парти рауагъта компани «Молпродукт», йæ директор Абайты Алан. Ног хойраг иннæтæй хицæн кæны, клетчаткæ, антиоксиданттæ æмæ цыхты минералон буаргъæдты сконд дзы хуыздæр кæй сты, уымæй. Кристинæ архайдта Уæрæсейы хъæууонхæдзарадон уæлдæр ахуыргæнæндæтты студентты, аспирантты æмæ æрыгон ахуыргæндты ‘хсæн хуыздæр наукон куыстыты Æппæтуæрæсеон конкурсы фыццаг къæпхæны. Чызджы наукон разамонæг у хъæууонхæдзарадон наукæты кандидат Кокойты Аленæ – технологон менеджменты факультеты «Куыстады технологитæ, фосдарынады продукцийы æвæрын æмæ бакуысты» кафедрæйы доцент. Дарддæр æнхъæлмæ кæсынц конкурсы фæуæлахиз уæвын æмæ патент райсынмæ.
Республикæйы хъæууон хæдзарады министры хæстæ рæстæгмæ æххæстгæнæг Мæхъиты Алан бафиппайдта, хойраджы промышленносты инновацион технологиты рæзт фыдыбæстаг агропромы быцæуархайд æмæ адæмы царды хæрзхъæддзинадæн ахъаз кæй уыдзысты. Æрыгон ахуыргæндты ахæм проекттæ бизнес æмæ паддзахады ‘ххуысæй комкоммæ кæй уыдзысты ахъаз технологон хæдбардзинад æмæ паддзахады хойраджы æдасдзинадæн. Кæй сты сæрыстыр нæ студенттæй æмæ дарддæр дæр сæ хъæппæрисæн кæй æххуыс кæндзысты.
ХУЫБИАТЫ Ларисæ
