Номдзыд ахуыргæндтæ, профессортæ Æлборты Барысби æмæ Туаты Ольгæйы райгуырды 140 азы юбилейты кадæн Хетæгкаты Къостайы номыл Ирон литературæйы музейы байгом сæ цард æмæ бирæвæрсыг зонадон æмæ рухстауæн архайдыл дзурæг мидисджын равдыст «Рухстауджытæ».
Цы къамтæ, къухфыстытæ, хъуыддаджы гæххæттытæ æмæ чингуытæ дзы фенæн ис, уыдон ист сты РЦИ-Аланийы Национ æмæ Ирон литературæйы музейы хъæздыг æвæрæнтæй.
Равдыст гом кæныны кадджын æмбырды архайдтой æмæ Æлборты Барысби æмæ Туаты Ольгæйы зонадон æмæ рухстауæн, стæй зын, фæлæ удварны сгуыхтытæй хъæздыг царды фæндаджы тыххæй сæ хъуыдытæ дзырдтой: РЦИ-Аланийы культурæйы министры хæдивæг Рæмонаты Маринæ, Национ музейы хайады сæргълæууæг, историон наукæты кандидат Козаты Петр, нæ республикæйы Фысджыты цæдисы правленийы сæрдары хæдивæг, зындгонд прозаик Цомартаты Изæтбег, Дзæуджыхъæуы 4-æм скъола-гимназы ахуыргæнæг Хæллаты Азæ, Национ наукон библиотекæйы хайады методист Хъараты Ритæ, Туаты Ольгæйы цард, зонадон æмæ рухстауæн архайдыл дзурæг æрмæджытæй чиныг «Она была первой» саразæг, историк Туаты Лянæ, æрыгон курдиатджын поэт Æлборты Азæ æмæ ацы рæнхъыты автор. Уый ма сарæзта номдзыд ахуыргонд Æлборты Барысбийы цард æмæ зонадон архайдыл дзурæг буклет «Фарны лæг» æмæ йæ равдыст «Рухстауджытæ»-йы байгом кæныны размæ рауагъта мыхуыры.
Равдыст саразыныл зæрдиагæй бацархайдтой: Ирон литературæйы музейы сæргълæууæг Бдайциаты Земфирæ, хистæр зонадон кусæг Цхуырбаты Сергей æмæ ацы æрмæг ныффыссæг æмæ номарæн æмбырд амонæг.
ГАСАНТЫ Валери
