Бетъырбухы XXIX Дунеон экономикон форум байгом 3 июны равдыстыты центр «Экспофорум» æмæ ахæсдзæн 6 июнмæ. Йæ сæйраг темæ – «Прагматикон диалог — æнæцæлхдур фидæнмæ фæндаг».
Форум æрæмбырд кодта 20 мин архайæджы 100 паддзахадæй фылдæр, уыимæ дзы 76 бæстæйæ æрбацыдысты паддзахадон архайджытæ æмæ политиктæ.
Уазæг паддзахад дзы фыццаг хатт у Саудаг Арави – сæ делегацийы ис 200 адæймаджы, сæ сæргъы – энергетикæйы министр, афтæмæй. 5 июны пленарон æмбырды архайдзысты Уæрæсейы, Узбекистаны, Танзанийы президенттæ, стæй Китайы Адæмон Республикæйы Сæрдары хæдивæг æмæ Саудаг Аравийы экономикæйы министр.
Форумы хъуыддаджы программæйы архайынц Уæрæсейы Хицауады минæвæрттæ – министртæ, егъау компаниты, бизнесæмæ банкты минæвæрттæ, амалхъомтæ, ахуыргæндтæ… Раныхас дзы кæндзæн Уæрæсейы Президент Владимир
Путин. Йæ пресс-нымæрдар Дмитрий Песков куыд зæгъы, афтæмæй йæ раныхас уыдзæн арфхъуыдыджын æмæ мидисджын.
Цалдæр азы фæстæ фыццаг хатт форуммæ æрбацыд Америкæйы Иугонд Штатты президент Дональд Трампы администрацийæ æрвыст официалон минæвар Родни Мимс Кук-кæстæр.
Программæйы ис 150 сессийæ фылдæр, дихгонд сты темæтæм гæсгæ.
Форумы архайы РЦИ-Аланийы делегаци республикæйы Сæргълæууæг Сергей Меняйлойы разамындæй. Делегацийы уæнгтæ – Хицауады Сæрдар Дзанайты Барис, фыццаг вице-премьер Атарты Георги, регионы Экономикæйы рæзты министрады минæвæрттæ. Форумы куысты фыццаг бон хъуыддаджы ныхас цыд Республикæ Хакасийы экономикон рæзты министр Роман Ковтунимæ регионты ‘хсæн æмгуыстадыл, уыимæ, инвестицитæ æмæ туризмы къабазы.
Ацы аз форумы программæйы сæйраг темæ у дунеон экономикæйы егъау ивддзинæдты рæстæг рæзты ног модель саразын.
Уымæй уæлдай ма, ныхас цæудзæн финансон культурæ, кадртæ, технологитæ, базарад, бизнес æмæ иннæ паддзахæдтимæ æмгуыстадыл.
Форумы Цæгат Ирыстоны Хицауад бафысдзæн къорд документы æмгуыстады тыххæй, бæлвырддæр зæгъгæйæ та, бадзырдтæ акционерон æхсæнæдтæ «Росагролизинг», «ВымпелКом», Республикæ Адыгеимæ, Сбербанк æмæ ВТБ-имæ, Арæзтадон æрмæджытæ уадзæн иугондимæ, Стратегион хъæппæристы агентадимæ, Уæрæсейы адæмон хæдзарад æмæ паддзахадон службæйы академи æмæ Мæскуыйы мэриимæ ахуырады фарстаты.
Сергей Меняйло ма фембæлдзæн «Мостранс-проект» -ы генералон директор Владимир Титовимæ, архайы сесситæ æмæ Уæрæсейы Федерацийы Хицауады Аппараты вице-премьер Дмитрий Григоренко кæй сарæзта, уыцы æмбырды. Ратдзæн интервьютæ федералон дзыллон хабархæссæг фæрæзтæн.
– Нæ куыст райдыдта Бетъырбухы Дунеон экономикон форумы. Хъуыддаджы фембæлдтытæ, æмгуыстады тыххæй бадзырдтæ бафыссын, интервьютæ – ахæм у нæ куысты фæтк. Форумы сæйраг цау – Уæрæсейы Президент Владимир Путин кæм архайдзæн, уыцы пленарон æмбырд. Махæн форумы нæ куысты фæстиуæг – нæ республикæйы социалон-экономикон рæзтыл рæстмæ чи фæзындзæн, ахæм бадзырдтæ бафыссын æмæ ног гæнæнтæ ссарын, – фæбæрæг кодта Сергей Меняйло.
Ныридæгæн уал Цæгат Ирыстон æмæ компани «Росагролизинг» бафыстой æмгуыстады тыххæй бадзырд. Документы бын сæ къухтæ бафыстой регионы Сæргълæууæг Сергей Меняйло æмæ акционерон æхсæнад «Росагролизинг»-ы генералон директор Павел Косов.
– Ацы бадзырды руаджы республикæ райсдзæн нырыккон ног хъæууонхæдзарадон техникæ – аграрон къабазы архайджытæн æй сæ бон лизингæй райсын уыдзæн. Уый та, æнæмæнг, хуыздæрырдæм фæзындзæн сæ куыстыл, фæфылдæр уыдзæн сæ тыллæгæрзад, æмæ афтæмæй республикæйы экономикæйы бæрæггæнæнтæ фæхуыздæр уыдзысты. Уыимæ, кæй зæгъын æй хъæуы, зæхкусджытæн лæвæрд цæудзæн паддзахадон æххуыс дæр. Æууæндын, абон цы бадзырдтæ бафыссæм, цы фембæлдтыты архайæм, уыдон хорзырдæм фæзындзысты нæ хъæууон хæдзарадыл, æмткæй райсгæйæ, республикæйы цардыл, – загъта Сергей Меняйло.
Форум дарддæр кæны йæ куыст.
РЦИ-Аланийы Сæргълæууæг æмæ Хицауады пресс-службæ
