Хæххон-металлургон институты студенттæ иуæндæсæй систы студентон къорд «Тесла»-йы уæнгтæ. Уыдон бавнæлдтой «Россети Цæгат Кавказ»-ы хайад «Цæгаткавказэнерго»-йы объекттыл кусынмæ. Июлы кæронмæ студентон къорд электрон хызты компанийы æххæстбарджын уæнг суыдзæн.
Алы студент дæр официалон æгъдауæй фидаргонд æрцыд хайады, цалынмæ сæ практикон архайд кæронмæ нæ фæуа, уæдмæ. Уыцы рæстæг æрыгæттæн хаст æрцæудзæн сæ фæллойадон стажмæ. Уый хорз фæахъаз уыдзæн, фæсахуыр компанимæ куыстмæ æрбацæуынвæнд чи скæна, уыдонæн.
Нырмæ уал фæсивæд дихгонд æрцыдысты электрон компанийы алыхуызон службæты ‘хсæн, сæ зондамонджытæ сты фæлтæрдджын специалисттæ. Цы хæстæ сыл æвæрд уа, уыдонæн сæрмагонд бар дæттын нæ хъæуы. Фидæны энергетиктæн студентон къорд хуымæтæджы хъуыддаг нæу, сæ бон у æххæст практикæ райсын, энергетикæйы ахсджиагдæр цаутимæ базонгæ уæвын, аргъ кæмæн нæй, ахæм фæлтæрддзинад энергокомпанийы райсын.
Практикон хъуыддæгтæм бавналыны размæ уал студентон къорд техникон æдасдзинады æмæ фæллой хъахъхъæныны æппæт фарстатæ равзæрстой, инструктаж ацыдысты. Реанимацион архайды æппæт авналæнтæ базыдтой, электрон тыхы цæф райсæгæн фыццаг медицинон æххуыс бакæныны хъуыддæгтæм сты рæвдз.
Нæ уацхæссæг
