Фæдзæхстадон пенситæ
Уæрæсейы Социалон фонд 1 августæй ногæй банымадта, кусгæ чи кæны, уыцы адæмæн сæ фæдзæхстадон пенситæ.
Сæ пенси фæфылдæр уыдзæн, официалон æгъдауæй 2025 азы кусын чи райдыдта æмæ йæ куыстдæттæг фæдзæхстадон фондмæ æрвылмæй бафыстытæ кæмæн æрвыста, уыдонæн. Сæ пенситыл æппынфылдæр бафтдзæн æртæ коэффициенты. Ацы аз иу пенсион коэффициенты аргъ у 156 сомы æмæ 76 капеччы. Афтæмæй, августы ног нымадмæ гæсгæ, амынд адæймæгтæн сæ пенситыл бафтдзæн 470 сомы æмæ 28 капеччы.
Æмбырдгæнæн пенситæ
1 августæй адæмæн 17,3 процентæй фæфылдæр кæндзысты æмбырдгæнæн пенситæ дæр. Ныртæккæ пенси йæхицæн чи æмбырд кæны, уыдон æрвылмæй сæ хыгъдимæ, рæстæмбис нымадæй, кæй бахæссынц, уыцы 1 600 сомыл ма бафтдзæн 286 сомы æмæ 4 капеччы, афтæмæй, æрвылмæйон бафыст схæццæ уыдзæн 1 886 соммæ æмæ 4 капекмæ.
Ноджы фылдæр – 19,3 процентæй (кæнæ та 579 сомæй) – фæфылдæр уыдзысты, паддзахады финансон æххуысæй пенси æмбырдгæнæн программæйы чи архайдта, науæд йæ фидæны пенсийы хыгъдмæ ныййарæджы капитал чи барвыста кæнæ та программæйы дæр чи нæ архайдта, афтæмæй йæ пенси йæхæдæг чи æмбырд кодта, уыдонæн.
Ацæргæ адæймæгты пенситæ
1 августæй ма дыууæ хатты фæфылдæр уыдзæн, июлы 80 азы кæуыл сæххæст кæнæ та фыццаг къорды инвалидыл кæй банымадтой, уыцы ацæргæ адæмæн сæ пенсийы уæлæмхасæн бафыст.
Афтæмæй, уыцы уæлæмхасæн бафыст 9 584 сомæй æмæ 69 капеккæй схæццæ уыдзæн 19 169 соммæ æмæ 38 капекмæ. Бафыст дыууæ хатты цæмæй фæфылдæр уа, уый тыххæй адæймаджы нæдæр искуыдæм цæуын, нæдæр курдиат фыссын хъæуы. Зæгъын хъæуы уый, æмæ, адæймаг фыццаг къорды инвалид кæй ссис, уымæ гæсгæ йын йæ пенси кæд иу хатт фæфылдæр кодтой, уæд ын æй дыккаг хатт, 80 азы йыл кæй сæххæст, уымæ гæсгæ нал фæфылдæр кæндзысты.
Уымæй уæлдай, 80 азы кæуыл сæххæст æмæ фыццаг къорды инвалид чи у, уыдонæн сæ фæдзæхстадон пенситыл бафтаудзысты 1 413 сомы æмæ 86 капеччы, паддзахадон пенситыл та – 1 470 сомы æмæ 64 капеччы.
