Сыгъзæрин фæззæгимæ та райдыдта ног ахуыры аз дæр. Фæлæ сæрдыгон фæлладуадзæн бонтæ дæр дзæгъæлы нæ фесты, йæ райгуырæн бæстæйы историйæн аргъ чи кæны, уыцы æрыгон фæлтæрæн.
Цæгат Ирыстоны Хетæгкаты Къостайы номыл паддзахадон университеты сæрды сбæрæг кодтой æрвылазон республикон наукон конкурс «Ирыстон-Аланийы æвзонг историк»-ы уæлахиздзауты. Конкурсы нысан уыд рæзгæ фæлтæры разæнгард кæнын Цæгат Ирыстоны истори арф базонын æмæ уарзынмæ. Архайдтой дзы республикæйы астæуккаг ахуырадон скъолаты хистæр кълæсты ахуырдзаутæ æмæ колледжты студенттæ.
Ацы аз уæлахиздзаутæ систы Уæллаг Санибайы астæуккаг скъолайы ахуырдзаутæ Æлборты Арсен æмæ Дзебысаты Дамир. Æрыгон иртасджыты куыст – «Фыдыбæстæйы Стыр хæсты азты немыцаг-фашистон лæбурджыты Цæгат Ирыстоны сабыр цæрæг адæмы ныццæгъдыны фыдвæнды æвдисæндартæ» райста экспертон советы уæлдæр баллтæ.
Ахуырдзауты бацæттæ кодта Уæллаг Санибайы астæуккаг скъолайы историйы ахуыргæнæг, конкурс «Афæдзы ахуыргæнæг»-ы уæлахиздзау, ЦИПУ-йы историон факультеты Иумæйаг историйы кафедрæйы хистæр ахуыргæнæг æмæ Скæсæны бæстæтæ иртасæг специалист Темыраты Маргаритæ.
Кадджын мадзал ацыд ЦИПУ-йы Ахуыргæндты советы залы. Дипломтæ æмæ хæрзиуджытæ уæлахиздзаутæ æмæ призертæн радтой ЦИПУ-йы наукон архайды проректор Тенгиз Тиникашвили æмæ ЦИПУ-йы историон факультеты декан, Уæрæсейы историон æхсæнады РЦИ-Аланийы хайады советы сæрдар Плиты Зæлинæ.
Экспертон совет сбæрæг кодта архайджыты цæттæдзинады бæрзонд æмвæзад, архивон документтимæ кусыны арæхстдзинад æмæ райгуырæн зæхмæ уарзондзинад. Конкурсы архайджытæ иууылдæр райстой сертификаттæ. Уый сын фæахъаз уыдзæн уæлдæр ахуыргæнæндæттæм цæугæйæ: дæтты сын уæлæмхасæн баллтæ иумæйаг паддзахадон фæлварæнты бæрæггæнæнтимæ. Уыдон нымад цæудзысты ЦИПУ-йы историон факультеты бакалавриаты алы къабазмæ цæугæйæ дæр.
Кæронбæттæны историон музейы директор Мамиаты Михал сывæллæтты базонгæ кодта рагон алайнаг хæзнатимæ.
Ацы кадджын æмæ ахсджиаг мадзал бацæттæ кодтой Цæгат Ирыстоны Хетæгкаты Къостайы номыл паддзахадон университет, РЦИ-Аланийы Ахуырад æмæ наукæйы министрад, республикæйы Архивон службæ æмæ Уæрæсейы историон æхсæнады РЦИ-Аланийы хайад. Конкурсы къæпхæнтæ бацæттæ кæныны хъуыддаджы стыр æххуыс бакодта ЦИПУ-йы университетмæ бацæуыны агъоммæйы цæттæдзинады хайад æмæ йæ разамонæг Фидараты Клеля. Бузныг сын зæгъæм. Сывæллæттæн та нæ зæрдæ зæгъы ног æнтыстдзинæдтæ ахуыры фæндагыл Ирыстоны намысæн.
