Ирон адæммæ бæгæны хуымæтæг нозт нæу. Алы бæрæгбонмæ дæр æй сыгъдæгзæрдæйæ бацæттæ кæнæм. Сыгдæг задæй конд ирон бæгæныйæ кувæм Хуыцаумæ.
Бæгæны фыцыны сусæгдзинæдтæ цæмæй ма ферох уой æмæ фæлтæрæй фæлтæрмæ цæуой, уый тыххæй æрвылаз бæгæныфыцæн хæдзар «Бавари» аразы фестиваль-конкурс «Ирон бæгæны».
Фыццаг хатт æй скодтой 2010 азы. Цæгат Ирыстоны æппæт районты хуыздæр бæгæныфыцджытимæ дзы Хуссар Ирыстоны минæвæрттæ дæр архайын куы райдыдтой, уæд æппæтадæмон ссис. Йæ арæнтæ уæрæхдæр, йæ архайджыты нымæц фылдæр кæны азæй-азмæ. Се ‘ппæтæн дæр свæййы стыр бæрæгбон – адæмон хъæзтытимæ, æрмдæсныты куыстыты равдыстимæ, зард æмæ кафтимæ. Йæ кæронбæттæн хай ацæуы бинонты фæлладуадзæн парк «Альпинайы».
Бæркадкъух æфсинтæ бацæттæ кæнынц ирон хæринæгтæ, фынджы фидауц вæййы сау бæгæныйы къус. Нæртон, рæсугъд бæрæгбон та æрцыд Ирыстоныл. Æрбацæуæг адæмы дисы æфтыдтой æрмдæсныты куыстыты равдыст – хиконд куклатæ ирон уæлæдарæсы, хъæдæй конд мигæнæнтæ, нымæтын дзаумæттæ, цыллæ кæлмæрзæнтæ æмæ æндæртæ, æдæппæтæй 60 адæймаджы бæрц сæ куыстытæ равæрдтой равдысты. Ерысты архайджытæн, æппæт уазджытæн зæрдиаг арфæ ракодта бæгæныфыцæн хæдзар «Бавари»-йы генералон директор Битарты Зелимхан.
– Абон нæм цы бирæ уазджытæ æрбацыд, уыдоны фенд мын æхсызгон у. Уæлдай бузныг зæгъын нæ бæгæныфыцджытæн, нæ рæдау æфсинтæн. Дард рæттæй, суанг фæсарæнтæй нæм нæ хотæ, нæ æфсымæртæ ссыдысты, æмæ сын арфæ кæнын. Ирæй дард цæргæйæ уæ ирон æгъдау кæй нæ рох кæнут, уый тыххæй уын бузныг, – загъта Битары-фырт.
Ацы аз цы ногдзиндтæ бахастой фестивалмæ, уыдонæй иу – «Бæгæныйы гимн». Адæмы размæ йæ рахастой нæ республикæйы адæмон артисткæ Хадыхъаты Аллæ æмæ зарæггæнæг Хъæцмæзты Владимир. Ирон æгъдаумæ гæсгæ, хистæртæ скуывтой æртæ чъирийы.
Сценæйыл иу иннæйы фæстæ кæрæдзийы ивтой кафджытæ, зарæггæнджытæ, алы районты минæвæрттæ. Уыцы рæстæг жюрийы уæнгтæ ахуыстой хуыздæр, хæрзаддæр, зæрдæмæдзæугæдæр бæгæны. Æвзæрстой уæлахиздзауты. Жюрийы хицæн къорд та бæрæг кодта, бæгæныфыцджытæй бæркадджындæр фынг чи бацæттæ кодта, уый.
Адæм тыхджын къухæмдзæгъд кодтой конкурсы архайджытæ – Гутнаты Зæлинæ Есентукийæ, Лохты Аллæ Краснодарæй, Хуытьинаты Иринæ Казахстанæй, Остъаты Зауыр Испанийæ, Æлбегаты Гюшра Туркæй, Цопанаты Риммæ Канадæйæ, Чочиты Фатимæ Екатеринбургæй. Цæгат Ирыстоны минæвæрттæ: Хадыхъаты Зарæ Дзæуджыхъæуæй, Мæздæджы районæй Хуыгаты Ленæ, Æрæфы районæй Гегкиты Светæ, Æрыдоны районæй Тебиаты Галинæ, Дыгуры районæй Æрсæгаты Ленæ, Горæтгæрон районæй Букылты Аллæ, Рахизфарсы районæй Дзиуаты Оксанæ, Алагиры районæй Плиты Неля æмæ Кировы районæй Болæтаты Фатимæйæн.
Æппæт архайджытæн дæр радтой кады дипломтæ æмæ зæрдылдарæн лæвæрттæ.
Уæлдай арфæтæ æмæ къухæмдзæгъд уæлахиздзаутæн.
2026 азы хуыздæр бæгæныфыцæгыл банымадтой Тебиаты Галинæйы Æрыдоны районы Рассветы хъæуæй. Дыккаг бынат бацахста Хуытъинаты Иринæ Казахстанæй, Æрæфы районы минæвар Гегкиты Светланæйæн та радтой æртыккаг бынат. Уæлахиздзаутæн радтой арфæйы фыстæджытæ æмæ æхцайы премитæ.
Нæ иннæ фембæлдмæ «Ирон бæгæны-2027»-ы!
Гугкаты Жаннæ
