РЦИ-Аланийы Сæргълæууæг Сергей Меняйло фембæлд Уæрæсейы Сылгоймæгты цæдисы регионалон хайады минæвæрттимæ. Уыдон хорзæхджын æрцыдысты нæ бæстæйы Президент Владимир Путины арфæйы фыстæджытæй. Æхсæнадон организацийы æртæ сæрæн сылгоймагæн Владимир Путины къухæвæрдимæ фыстæджытæ радта Сергей Меняйло.
Гуманитарон архайд æмæ социалон ахадындзинад кæмæн ис, ахæм хъуыддæгтæ цæттæ кæнын æмæ аразыны æнтыстджын куысты фæдыл УФ-йы Президенты арфæйы фыстæджытæ райстой: Людмила Тихонова, Магкæты Аллæ æмæ Ольга Некрасова. Нæ республикæйы Сæргълæууæг куыд загъта, афтæмæй Президенты фыстæджытæ бæрзонд бæрæггæнæн сты, социалон хъæппæристæ æххæст кæнын æмæ æхсæнадон рæзтмæ зынгæ бавæрæн цы Сылгоймæгты цæдисы уæнгтæ хæссынц, уыдоны фæллойæн.
– Арфæ уын кæнын уæ сæрæн архайдæн, сабидуг æмæ мады фыдæбонæн, бинонты традицитæ фидардæр кæй кæнут æмæ рæзгæ фæлтæры хъомыладмæ ахъаззаджы æвæрæн кæй хæссут, уый тыххæй. Нæ республикæйы сылгоймæгтæм уæлдай ахастдзинад ис, дис кæнæм уæ æхсæнадон куыст æмæ традицион хæзнатыл æнувыддзинад сæрæн граждайнаг миниуджытыл куыд бæттут, ууыл дæр, – загъта Сергей Меняйло.
Æхсæнадон организацийы сылгоймæгты схорзæхджын кæныны хъуыддаг арæзт æрцыд Советон сылгоймæгты антифашистон комитеты равзæрды 85 азы кадæн.
Саутæты Тамилæ
