РЦИ-Аланийы ахуырад æмæ наукæйы министры хæстæ рæстæгмæ æххæстгæнæг Андрей Швецов кусæг æмбырд скодта йæ хæдивджытæ æмæ профилон хайæдты разамонджытимæ.
Рæгъмæ рахастæуыд, хæстæгдæр рæстæгмæ ведомствæ йæ размæ цы нысантæ æвæры, уыдон. Æргом аздæхтой хæстон-патриотон хъомылады уынаффæгæнджыты архайдмæ ахуырады кусæндæтты. Уыцы дæсныйадыл хæст адæм тынг агуырд цæуынц ахуырады, уыдон скъоладзаутæм фидар кæнынц бæстæйы истори, йæ хъæбатыртæ, йæ традицитæ нымайыны фæтк, æрыгæттимæ кусынц бынæтты.
Регионы хистæркъласонтæн скуыста проект «Наукон сабат», зæгъгæ. Алы сабат дæр ахуыргæндтæ, инженертæ кæндзысты æргом лекцитæ. Уыдон сты наукон центртæ, Уæрæсейы æхсæнад «Зонынад»-ы уæнгтæ. Ахæм лекци уал уыд Мæздæджы районы, хъæппæрис адарддæр уыдзæн республикæйы иннæ районты дæр. Знон уыд Уæлæмхасæн ахуырады бон, педагогтæ, хъомылгæнинæгтæ æмхуызонæй сбæрæг кодтой сæ бæрæгбон.
Педагогтæ сабиты курдиæттæ, арф æвæрд сфæлдыстад райхалыныл æппынæдзух кусынц спорты, техникæйы, æндæр фæндæгтыл. Æппæт республикæйы дæр уыд Уæлæмхасæн ахуырады гом дуæртты иумæйаг боны архайæг. Сывæллæттæн сæ бон уыд сæ арæхстдзинæдтæ равдисын, ныв кæнынæй райдай æмæ кафтæй фæу.
Ног къуыри Цæгат Ирыстоны ахуырад бæрæг кæндзæн ирон литературæйы бындурæвæрæг, поэт, нывгæнæг, рухстауæг Хетæгкаты Къостайы райгуырæн бон. Алы скъолайы дæр скæндзысты зæрдылдарæн хъуыддæгтæ, Къостайы сфæлдыстадон бынтыл ныхас цæудзæн.
Ахуырад æмæ наукæйы министрады пресс-службæ
