Поэт, журналист, газет «Рӕстдзинад»-ы кусӕг Гасанты Валерийӕн йе ‘мдзӕвгӕты ӕмбырдгонд «Мӕ уды зарӕджы!» тыххӕй саккаг кодтой Хъамбердиаты Мысосты номыл паддзахадон премийӕ (литературӕйы къабазы номинаци «Поэзи»-йы). Цӕгат Ирыстоны Сӕргълӕууӕг Битарты Вячеслав ын хӕрзиуӕг радта Хицауады хӕдзары.
— Ирыстон зондджын ӕмӕ курдиатджын адӕмӕй кӕддӕриддӕр сӕрыстыр уыд. Ацы преми кӕй ном хӕссы, уыцы поэт Хъамбердиаты Мысост йе ‘цӕг дунемӕ ацыд хӕрзӕрыгонӕй, фӕлӕ йӕ фӕстӕ ныууагъта фӕрнджын литературон бынтӕ. Ныры фӕсивӕд сфӕлдыстадон куыстмӕ се ‘ргом кӕй здахынц, уый мын ӕхсызгон у. Иронау фыст уацмысты фӕрцы национ литературӕ дарддӕр кӕй рӕздзӕн, ӕмӕ фысджыты ног фӕлтӕртӕ ирон дзырд нырӕй бӕрзонддӕр ӕмвӕзадмӕ кӕй сисдзысты, уый мӕ уырны. Мӕ зӕрдӕ дын зӕгъы, ног сфӕлдыстадон ӕнтыстдзинӕдтӕ, — ӕрыгон литераторӕн хӕрзиуӕг дӕтгӕйӕ, загъта Битары-фырт.
— Премийы тыххӕй уын — бузныг. Нӕ республикӕйы Хицауад национ культурӕйы рӕзтмӕ здахы стыр ӕргом. Фарон кӕй бацӕттӕ кодтон, уыцы чиныг «Мӕ уды зарӕг!»-мӕ бахастон фӕстаг цалдӕр азы дӕргъы фыст адӕймаджы ӕнкъарӕнтӕ ӕвдисӕг ӕмдзӕвгӕтӕ. Архайдзынӕн литературон бӕрзӕндтӕм схизыныл ӕмӕ иртасӕн куыст кӕныныл, — зӕрдӕ йын бавӕрдта Гасаны-фырт.
Конкурсы уӕлахиздзауӕн раарфӕ кодтой Цӕгат Ирыстоны Хицауады Сӕрдары хӕдивӕг Иринӕ Азимова ӕмӕ культурӕйы министр Къубалты Эльбрус.
Уӕ зӕрдыл уын лӕууын кӕнӕм, 35 азӕй ӕрыгондӕр автортӕн Хъамбердиаты Мысосты номыл паддзахадон преми раттынц мидисджын литературон уацмыстӕ сфӕлдисыны ӕмӕ удварны фарстатӕ раргом кӕныны тыххӕй. Конкурсы уӕлахиздзау райсы 50 мин сомы.
