Сфӕлдыстадон кусӕг ӕрдзӕй уӕздан куы рахӕссы, уӕд уыцы уаг фӕзыны йӕ царды ӕмӕ сфӕлдыстадон фӕндагыл. УФ-йы Фысджыты цӕдисы уӕнг, курдиатджын поэт ӕмӕ прозаик Кокойты-Грищенко Валентинӕйӕн Хуыцау цы хорзӕхтӕ радта, уыдоны фӕрцы йӕ уды сфӕлдыстадон цӕхӕр тауы нӕ адӕмы зӕрдӕты. Ацы бонты уый бӕрӕг кӕны йӕ юбилей.
Уый фӕдыл ӕртыццӕджы Дзӕуджыхъӕуы центрон библиотекӕйы уыд литературон изӕр. Уырдӕм ӕрбацыдысты сфӕлдыстадон интелигенцийы , ӕхсӕнадон организациты минӕвӕрттӕ, Валентинӕйы хиуӕттӕ, ӕмбӕлттӕ, студенттӕ, скъоладзаутӕ ӕмӕ чиныгкӕсджытӕ. Литературон изӕры райдайӕны поэтессӕйы цард ӕмӕ сфӕлдыстадон фӕндаджы тыххӕй радзырдта изӕрсаразӕг, Дзӕуджыхъӕуы центрон библиотекӕйы бӕстӕзонӕн хайады сӕргълӕууӕг, РЦИ-Аланийы культурӕйы сгуыхт кусӕг Дзугаты Риммӕ. Уый фӕстӕ поэтӕн зӕрдиаг арфӕтӕ ракодта РЦИ-Аланийы Фысджыты цӕдисы сӕрдар, Хетӕгкаты Къостайы номыл премийы лауреат Агънаты Гӕстӕн.
— Валентинӕ у тынг цӕстуарзон ӕмӕ зӕрдӕхӕлар адӕймаг. Цыфӕнды хъуыддаджы фӕдыл ӕм куы фӕдзурӕм, уӕддӕр ӕнӕзивӕгӕй нӕ фарсмӕ ӕрбалӕууы. Фысджыты цӕдисы ӕмӕ йӕ хъӕппӕрисӕй сывӕллӕтты хӕдзӕртты, рӕвдауӕндӕтты, скъолаты арӕзт ӕрцӕуынц поэзийы ӕмӕ музыкалон аивады изӕртӕ. Уӕдӕ йын литературӕйы жанрты дӕр чысыл не ‘нтысы. У 12 прозаикон ӕмӕ поэтикон чиныджы автор. Йӕ уацмыстӕ фыст сты аив ӕмӕ нуарджын ӕвзагыл. Ӕмӕ йын нӕ Цӕдисы номӕй зӕрдиаг арфӕ кӕнын, — загъта Гӕстӕн ӕмӕ юбилярӕн радта Арфӕты гӕххӕтт.
Литературон изӕры Валентинӕйы ӕмдзӕвгӕтӕ аив бакастыты Дзӕуджыхъӕуы 42-ӕм астӕуккаг скъолайы ахуырдзаутӕ. Йӕ поэтикон уацмыстыл арӕзт зарджытӕ аив азарыдысты зындгонд аивадиртасӕг Остъаты Татьянӕ, бард Наталья Лагодина.
Юбилярӕн ма зӕрдиаг арфӕ ракодтой «Иры Стыр Ныхас»-ы уӕнг, фӕллойы ветеран Томайты Шамил, Фысджыты цӕдисы сӕрдары хӕдивӕг Скъодтаты Эльбрус, ацы сфӕлдыстадон организацийы поэзийы секцийы разамонӕг, зындгонд поэт, Джусойты Нафийы номыл литературон премийы лауреат Хохойты Энвер, Дзӕуджыхъӕуы центрон библиотекӕйы сӕргълӕууӕг Цъӕхилты Зӕлинӕ, (уый Валентинӕйӕн балӕвар кодта Арфӕйы гӕххӕтт ӕмӕ уардиты баст), УФ-йы Профессионалон литераторты цӕдисы Цӕгат Ирыстоны хайады сӕрдар, филологон наукӕты кандидат Тменаты Дзерассӕ, УФ-йы Фысджыты цӕдисы уӕнгтӕ Соттиты Риммӕ, Альбинӕ Зайцева, Дыгъуызты Тенгиз, Наталья Куличенко.
Валентинӕйӕн йӕхи номыл фыст ӕмдзӕвгӕтӕ бакастыты Джусойты Нафийы номыл национ премийы лауреат, зындгонд поэт Кокойты Эльзӕ ӕмӕ поэт, бӕстӕзонӕг, публицист Александр Энглези.
Юбилейон изӕры кӕрон йӕ саразджытӕн ӕмӕ уазджытӕн зӕрдиаг бузныджы ӕмӕ арфӕйы ныхӕстӕ загъта Кокойты — Грищенко Валентинӕ. Бакаст, ирон нырыккон поэтты ӕмдзӕвгӕтӕй уырыссаг ӕвзагмӕ кӕй ратӕлмац кодта, уыдон.
Юбилейон изӕр арӕзт ӕрцыд Фысджыты цӕдисы ӕмӕ Дзӕуджыхъӕуы центрон библиотекӕйы хъӕппӕрисӕй.
Гасанты Валери
Къамтӕ систа Къӕбысты Харитон
