Цæгат Ирыстонмæ коронавирусæй тæссаг бæстæтæй чи æрбацæуы, уыдонæн скæнынц сæрмагонд анализтæ. Уый тыххæй фехъусын кодта Цæгат Ирыстоны гигиенæ æмæ эпидемиологийы центры вирусологон иртасæнты лабораторийы хицау МАМИАТЫ Светланæ.
Куыд бамбарын кодта, афтæмæй ныртæккæ лаборатори комкоммæ архайы ног коронавирусон инфекцийыл. Кусæндоны æвзарынц фæсарæйнаг бæстæтæй, æндæр регионтæй æрбацæуæг æмæ хæдзары пневмонийæ, гриппæй, æндæр инфекцион низтæй чи фæрынчын, ахæм адæмы уавæр.
Фæсарæнтæй чи æрбацæуы, уыдоны сбæрæг кæнынц фыццаг æмæ дæсæймаг бон, адæймаджы карантинæй суæгъд кæнынæн фаг у, анализтæ сыгъдæг куы разынынц, уый. Афтæмæй, низы æууæлтæм нæ кæсгæйæ, æндæр бæстæтæй æрбацæуджытæ лабораторон мадзæлттæй бæрæггонд цæуынц. 1 мартъийæ фæстæмæ уал 300 анализы скодтой, æмæ æппæт бæрæггæнæнтæ дæр сты сыгъдæг.
Мамиаты Светланæ сиды адæммæ, цæмæй сæхи æнæхъуаджы ма стæрсын кæной. «Хъуамæ алчидæр æмбара, цавæрфæнды грипп кæнæ вирусон хæцгæнизы рæстæг дæр хи хъæуы хъахъхъæнын, бирæ адæмы ‘хсæнмæ цæуын нæ хъæуы», — зæгъы дохтыр.
ÆХСАРАТЫ Розæ
