Цӕгат Ирыстоны Сӕргълӕууӕг Битарты Вячеслав радон хатт бабӕрӕг кодта ахсджиаг спортивон объект — футболы академи «Алани» ӕмӕ аргъ скодта арӕзтадон ӕмӕ иннӕ цӕттӕгӕнӕн куыстытӕн.
Республикӕйы разамонӕг ӕмӕ Хицауады Сӕрдары хӕдивӕг Иринӕ Азимова, стӕй физикон культурӕ ӕмӕ спорты министр Хуыгаты Алан ӕрзылдысты академийы бӕстыхӕйттыл. Инспекцион къорды уӕнгтӕн объектыл экскурси сарӕзта академийы директор Битарты Роберт.
Подрядон организацийы минӕвӕртты ныхасмӕ гӕсгӕ, ӕппӕт арӕзтадон ӕмӕ иннӕ цӕттӕгӕнӕн куыстытӕ дӕр цӕуынц пъланмӕ гӕсгӕ. Ӕппӕт куыстытӕ дӕр хъуамӕ ахицӕн уой 24 августмӕ.
— Баззад ма лыстӕг аивгӕнӕн куыстытӕ бакӕнын ӕмӕ академи йӕ хуыз скалдзӕн. Тагъд рӕстӕг ам ахуыр кӕнын райдайдзысты, спортыл ӕнувыд чи у, уыцы фӕсивӕд. Ахуырадон мадзӕлтты райдайӕнмӕ мах ӕвӕстиатӕй алыг кӕнын хъӕуы ӕппӕт баззайгӕ фарстытӕ дӕр, цӕмӕй академи йӕ хъомылгӕнинӕгтыл хӕрзцӕттӕйӕ сӕмбӕла, — бӕстыхӕйттӕ фенгӕйӕ, загъта Битарты Вячеслав.
Академийы разамонӕг куыд радзырдта, афтӕмӕй ныридӕгӕн бӕлвырд сты, тренертӕй чи кусдзӕн, уыцы 13 адӕймаджы. Хъомылгӕнджыты сӕргъы уыдзӕн фӕлтӕрдджын тренер Владимир Рокунов.
— Дызӕрдыг нӕ кӕнын, ацы кусӕндон футболы фидӕны «стъалыты» куырдадз кӕй суыдзӕн, ууыл. Фӕлӕ академийӕн йӕ размӕ ӕрмӕст уыцы нысан нӕ лӕууы. Академийы чи ахуыр кӕна, уыцы сӕдӕгай лӕппутӕй алчи чемпион не суыдзӕн, фӕлӕ, спорты бӕрзӕндтӕм тырнгӕйӕ, уыцы фӕсивӕдӕй хъуамӕ рауайа ӕгъдауджын, царды аккаг адӕймӕгтӕ. Уыцы ӕууӕл хынцгӕйӕ, академийӕн ахсджиаг уыдзӕн йӕ хъомыладон архайд дӕр. Ам фӕсивӕдӕн амондзысты кӕрӕдзийӕн аргъ кӕнын ӕмӕ хӕларӕй цӕрын, ӕнӕниз цардыуагмӕ ӕмхиц уӕвын, — бафиппайдта республикӕйы Сӕргълӕууӕг.
Фембӕлды архайджытӕ куыд фӕбӕрӕг кодтой, афтӕмӕй фыццаг къӕпхӕны арӕзтадон куыстытӕ кӕронмӕ ӕрхӕццӕ сты. Уыимӕ, фидӕны академийы бӕстыхӕйттыл бӕфтдзӕн. Зӕгъӕм, фидӕн азы уым аразын райдайдзысты бассейн, стӕй уӕлӕмхасӕн футболон фӕз.
Зындгонд куыд у, афтӕмӕй проектмӕ гӕсгӕ, академи-интернаты сӕйраг бӕстыхай уыдзӕн фондзуӕладзыгон агъуыст (уым ӕппӕт фадӕттӕ дӕр уыдзӕн ӕвзонг спортсменты цардархайдӕн). Бӕстыхайы фарсмӕ — дыууӕ футболон фӕзы трибунӕтимӕ, фӕлладуадзӕн тӕлм, хӕдтулгӕты ӕрлӕууӕн бынат ӕмӕ афтӕ дарддӕр. Академийы ахуыр кӕндзысты республикӕйы ӕппӕт районты 120 минӕвары бӕрц. Фыццаг ахуырадон къордты уӕнгтӕ ныридӕгӕн конкурсы бындурыл ӕвзӕрст ӕрцыдысты. Сӕрмагондӕй зӕгъын ӕмбӕлы, уыцы фӕсивӕды ‘хсӕн Хуссар Ирыстоны минӕвӕрттӕ кӕй ис, уый дӕр. Академийы хъомылгӕнинӕгтӕн иумӕйагахуырадон предметтӕ та амондзысты Дзӕуджыхъӕуы 17-ӕм скъолайы.
РЦИ-Аланийы Сӕргълӕууӕджы ӕмӕ Хицауады пресс-службӕ
