Горӕты цард нӕ сахуыр кодта фылдӕр къӕхты бынмӕ кӕсын. Нӕ сӕрмӕ рӕсугъд цъӕх арв ис, уый ма нӕ хатгай рох дӕр фӕвӕййы. Ӕмӕ нын йӕ ӕрфытӕ, йӕ уӕрхытӕ ӕмӕ рӕсугъддзинӕдтӕ басгарынӕн фадат чи радты, уыдон та сты Уӕлдӕфон флоты кусджытӕ.
Ӕрвылаз, августы ӕртыккаг хуыцаубоны вӕййы сӕ профессионалон бӕрӕгбон. Уый фӕдыл мах бабӕрӕг кодтам аэропорт «Владикавказ».
Уый бӕлццӕтты нымӕцмӕ гӕсгӕ, Цӕгат Кавказы федералон зылды аэропортты ӕхсӕн ахсы ӕртыккаг бынат. Ис ын федералон ӕмӕ стратегион нысаниуӕг, уымӕ гӕсгӕ алы бацӕуӕгмӕ дӕр лӕмбынӕг цӕстдард ис. Не ‘рбацыдмӕ ӕнхъӕлмӕ каст аэропорты PR-менеджер Данил Шепелев. Мидӕмӕ бацӕуынӕн бар дӕттӕг пропусктӕ нын рафыстой, авиаӕдасдзинады службӕйы хистӕр инспектор Гоча Тваури нын сӕрмагонд жилеттӕ радта. Ӕрмӕстдӕр нын уӕд бар уыд, хӕдтӕхджытӕ кӕм ӕрбадынц ӕмӕ кӕцӕй стӕхынц, уыцы фӕзмӕ рахизынӕн. Куыд базыдтам, афтӕмӕй йӕ дӕргъ у ӕртӕ мин метры. Райсомы аст сахатӕй изӕры аст сахатмӕ аэропорты терминалы уылты ацӕуы 1,5-2 мин адӕймаджы. Ӕрвылбон Беслӕны аэропорты суазӕг кӕнынц 7-9 хӕдтӕхӕджы.
Мӕнӕ арвы нӕ хӕдсӕрмӕ фӕзынд хӕдтӕхӕг. Сабыргай йӕ цӕлхытӕ атылдысты тӕхӕн фӕзыл. Уый авиакомпани ЮТэйры стыр боинг схӕццӕ Мӕскуыйӕ, сласта 158 бӕлццоны. Фондз минутмӕ йӕ цурмӕ бахӕццӕ асин-трамп, дӕс минуты фӕстӕ хӕдтӕхӕджы цур цы автобус ӕрлӕууыд уымӕ адӕм хизын райдыдтой. Хицӕн машинӕ та сын сӕ уӕзӕгтӕ раласта. Ӕмбӕлгӕ фӕткӕй иу минут дӕр фӕхицӕнгӕнӕн нӕй, чысыл къуылымпыйы тыххӕй дӕр авиакомпани аэропорт фӕивар кӕндзӕн. Хӕрз цыбыр рӕстӕгмӕ хӕдтӕхӕг ӕфснайд ӕрцӕуы, бахъуаджы рӕстӕг та йӕ артагӕй дӕр сифтонг кӕнынц.
Аэропорты терминал ӕмызмӕлд кӕны, иутӕ мидӕмӕ, иннӕтӕ ӕддӕмӕ тагъд кӕнынц. Иууылдӕр цӕуынц регистрацигонд. Нырыккон ифтонггарз, информацион технологитӕй пайда кӕнгӕйӕ, хъуыддӕгтӕ рӕвдздӕр цӕуынц. Алы бӕлццонмӕ дӕр мидбылхудгӕ, фӕлмӕнӕй дзуры агент Биазырты Альбинӕ. Хъӕугӕ документтӕм кӕсгӕйӕ, хъуамӕ къӕрцхъус ӕмӕ цырддзаст уай, ацы миниуджытӕй ӕххӕст сты бӕлццӕтты регистрацийы службӕйы агенттӕ.
Цӕмӕй ӕппӕт ацы стыр механизм ӕнӕкъуылымпыйӕ куса, уымӕ иудадзыг йӕ цӕст дары аэропорты генералон директор, фӕлтӕрдджын авиатор Сергей Чалов, стыр хӕстӕ ӕвӕрд ис йӕ хӕдивджытӕ Хъалӕгаты Олегыл, Андрей Чурюмовыл, Наталья Савинайыл, Денис Шевцовыл ӕмӕ ӕппӕт службӕтыл.
Иууылдӕр иумӕ кӕнынц стыр ӕмӕ вазыгджын хъуыддаг — бирӕ адӕмы фӕндараст кӕнынц уӕлдӕфон балцмӕ.
Гугкаты Жаннӕ
Къамтӕ систа КЪӔБЫСТЫ Харитон
