Уӕрӕсейы Федерацийы Конституцимӕ ивддзинӕдтӕ бахӕссыны фӕдыл хъӕлӕскӕнынад бацӕттӕ кӕныныл зӕрдиагӕй кӕй бакуыстой, уый тыххӕй РЦИ-Аланийы Центрон ӕвзарӕн къамисы кусджытӕ хорзӕхджын ӕрцыдысты республикӕйы паддзахадон ӕмӕ ведомствӕйон хӕрзиуджытӕй.
Цӕгат Ирыстоны Сӕргълӕууӕг Битарты Вячеславы амынддзинадмӕ гӕсгӕ, къамисы уӕнгтӕн арфӕ ракодта ӕмӕ сын сӕ хӕрзиуджытӕ радта республикӕйы Сӕргълӕууӕджы ӕмӕ Хицауады Администрацийы разамонӕг Челӕхсаты Рустем.
Администрацийы разамонӕг къамисы уӕнгтӕн бузныг загъта, ӕппӕт организацион мадзӕлттӕ дӕр афойнадыл ӕмӕ бӕрнонӕй кӕй сӕххӕст кодтой, хъӕлӕскӕнынад закъоны уагӕвӕрдты бындурыл ӕнӕкъуыхцыйӕ арӕзт кӕй ӕрцыд, ӕвзарджытӕн сӕ граждайнаг хӕс сӕххӕст кӕнынӕн ӕппӕт фадӕттӕ дӕр арӕзт кӕй ӕрцыд, уый тыххӕй.
— Арфӕйы аккаг сты участокты ӕвзарӕн къамисты уӕнгтӕ дӕр. Уыдон, сӕрмагонд эпидемиологон уавӕрты архайгӕйӕ дӕр сӕ куыст бӕрнонӕй бакодтой. Нӕ зӕрдӕ уын зӕгъы дарддӕрдӕр ӕнтыстджын архайд, — загъта Челӕхсаты Рустем.
Уый фӕстӕ ӕмбырды архайджытыл сӕмбӕлдысты сӕ хӕрзиуджытӕ — УФ-йы Центрон ӕвзарӕн къамисы Кады грамотӕтӕ ӕмӕ Арфӕйы фыстӕджытӕ, сӕрмагонд риуылдаргӕ нысантӕ ӕмӕ Цӕгат Ирыстоны Сӕргълӕууӕджы Арфӕйы фыстӕджытӕ.
РЦИ-Аланийы Сӕргълӕууӕджы ӕмӕ Хицауады пресс-службӕ
