Знон РЦИ-Аланийы Национ наукон библиотекæйы уыд Республикæ Цæгат Ирыстон-Аланийы пысылмæтты фарæстæм съезд.
Республикæйы пысылмæтты æхсæнадты делегаттæй фæстæмæ съезды архайдтой уазджытæ: РЦИ-Аланийы Хицауады Сæрдары хæдивæг Фадзайты Æхсарбег, Цæгат Кавказы Пысылмæтты координацион центры сæрдар Хъæрæсе-Черкесийы муфти Исмаил-Хадзы Бердиев, æхсæнадон змæлд «Иры Стыр Ныхас»-ы сæрдар Кучиты Руслан, РЦИ-Аланийы национ ахастдзинæдты фарстаты фæдыл министр Цуциты Аслан, Кæсæг-Балхъары муфти Хазрат-Али-Хадзы Дзасежев, Адыгей æмæ Краснодары крайы муфти Аскарби-Хадзы Карданов, Хъалмыхъы республикæйы муфти Султан-Ахмад-Хадзы Каралаев, Абу Ханифы номыл Цæгат Кавказы пысылмон университеты ректор Шарабуттин-Хадзы Чочаев, Дагестаны муфтийы хæдивæг Ахмад-Хадзы Надирбеков, Цæцæны республикæйы муфтийы хæдивæг Сульян-Хадзы Курбанов, Горæтгæрон районы сæргълæууæг Гаглойты Алан æмæ иннæтæ.
Съезды делегаттæ, уазджытæ æмæ сæрмагондæй РЦИ-Аланийы муфти Гуæцæлты Хадзымуратæн республикæйы Сæргълæууæг Битарты Вячеславы номæй арфæ ракодта Фадзайты Æхсарбег.
Фадзайы-фырт куыд бацамыдта, афтæмæй Гуæцæлты Хадзымураты разамындæй Ирыстоны пысылмæтты управленийы къухы фæстаг фондз азы бафтыд стыр æнтыстдзинæдтæ республикæйы адæмты ‘хсæн хæлардзинад, кæрæдзи æмбарынад æмæ фæсивæды ‘хсæн патриотон хъомылад фидардæр кæныны фарстаты.
Республикæйы Пысылмæтты удварны управлени фидар бастдзинæдтæ сарæзта Цæгат Кавказы республикæты пысылмон управленитимæ. Хæлардзинад æмæ æнгомдзинады уидæгтæ фидардæр кодта республикæйы ‘хсæн, зæрдиагæй архайдта республикæйы паддзахадон, æхсæнадон æмæ æндæр динтыл хæст организациты архайды цард фæхуыздæр кæныны хъуыддæгты.
Ирыстоны пысылмæтты фарæстæм съездмæ арфæйы фыстæг сæрвыста Уæрæсейы Президенты Администрацийы мидполитикæйы управленийы хицауы хæдивæг Михаил Белоусов.
Съезды архайджытæн æмæ сæрмагондæй Гуæцæлты Хадзымуратæн зæрдиаг арфæтимæ уыдысты сæ раныхæстæ Исмаил-Хадзы Бердиев, Кучиты Руслан, Цуциты Аслан æмæ Гаглойты Аланæн.
Съезды архайджытæ байхъуыстой Пысылмæтты удварны управленийы сæрдар муфти Гуæцæлты Хадзымураты дзуаппон докладмæ. Уый бæстон æмæ бæлвырдæй радзырдта, фондз азы дæргъы йе ‘мбæлттимæ сæ къухы цы æнтыстдзинæдтæ бафтыд, уыдоны тыххæй. Йæ раныхасы кæрон фæбæрæг кодта, сæ размæ цы ахсджиаг хæстæ лæууы, адæмты хæлардзинад, кæрæдзи æмбарынад фидардæр кæныны, экстремизм æмæ терроризмы ныхмæ архайыны хъуыддæгты.
Муфтийы дзуаппон раныхас делегаттæ банымадтой хорзыл æмæ ногæй æмхуызонæй схъæлæс кодтой сæ разамонæджы равзарыныл. Республикæйы пысылмæтты разамонæгæй баззад Гуæцæлты Хадзымурат.
Касаты Батрадз
Къам систа
Хъайырты Дианæ
