Адæмты Хæлардзинады орденæй хорзæхджынгонд, паддзахадон академион ансамбл «Алан»-ы ноггонд бæстыхай ацы мæйы кæрон Дзæуджыхъæуы кадджын уагæй байгом кæндзысты.
Ацы хабар фехъусын кодта нæ республикæйы Культурæйы министрады пресс-службæ.
Ведомствæйы хъусынгæнинагмæ гæсгæ, æппæт агъуыстытæ бындуронæй цалцæггонд æрцыдысты. Арæзтадон кусæндоны минæвар куыд загъта, афтæмæй аразджытæ бæстыхайы къултæ ногæй байсæрстой, стæй йын йæ сæр, сантехникæ æмæ хъармгæнæн системæ баивтой. Уымæй уæлдай, цалцæггонд бæстыхайы сæвæрдтой уæлдæф сыгъдæггæнæн нырыккон системæ.
Ацы азы апрелы бæстыхайы райдайæг цалцæггæнæн куыстытæ æрæджы кæронмæ ахæццæ сты.
Рубайты Нелли
