Нæ республикæйы æппæт наукон-ахуырадон æхсæнадæн æрцыд ахсджиаг æхсызгон цау: Хетæгкаты Къостайы номыл Цæгат Ирыстоны паддзахадон университеты экономикæ æмæ разамынды факультеты студенткæ Баскаты Аидæ ссис Егор Гайдары номыл сæрмагонд стипенди райсыны фæдыл ацы азы конкурсы уæлахиздзау.
Цыппæрæмкурсон студенткæйы ном бахастой бæстæйы дæс хуыздæр æрыгон экономисты номхыгъдмæ. Уæрæсейы Федерацийы Наукæ æмæ уæлдæр ахуырады министрады ацы азы 10 августы уагъд №479 бардзырдмæ гæсгæ, дæсныйад «Экономикон æдасдзинад»-ы студенткæйæн уæлдæр хæрзиуæг раттой экономикæйы къабазы æнтыстдзинæдты тыххæй. Фиппаинаг: курдиатджын студенткæ йæхи равдыста суинаг иртасæгæй (ныртæккæ Аидæ у Уæрæсейы Хицауады стипендиат дæр).
Егор Гайдары номыл стипенди нымад у Уæрæсейы студенттæ-экономисттæн лæвæрд æппæтæй кадджындæр хæрзиуджытæй иуыл. Егор Гайдары фонды архайдимæ амынд министрад саразы конкурс. Эксперттæ кæй наукон æнтыстдзинæдтæ банымайынц, æрвылаз преми раттынц æппæт бæстæйæ æрмæст дæс ахæм адæймагæн.
Конкурсы домæнтæ сты карз:
– хистæр курсыты (бакалавриат, специалитет), кæнæ магистратурæйы ахуырад;
– студент хъуамæ ахуыр кæна «хорз» æмæ «иттæг хорз» бæрæггæнæнтыл æмæ ахуыры хъуыддаджы хæстæ хъуамæ ма дара;
– студентмæ хъуамæ уой ахсджиаг наукон æнтыстдзинæдтæ: олимпиадæты уæлахизтæ, ист гранттæ, кæнæ та – мыхуыргонд æрмæджытæ.
Æрвылмæйон фиддоны бæрц у 15 мин сомы (уæлахиздзауæн ацы ‘хца фидынц дыууадæс мæйы дæргъы). Æхцайæ ‘ххуысæй фæстæмæ лауреаттæн ис фонды арæзт дзыллон мадзæлтты архайыны фадат (зындгонд Гайдарон форумы семинарты архайд нымайгæйæ).
– Аидæйæн йе стыр æнтыстдзинады фæдыл арфæ кæнæм! Студенткæ нæ факультет æмæ æппæт университетæн дæр кад скодта. Аидæйы уæлахиз нымад у биноныг фæллойы æвдисæныл. Нæ зæрдæ йын зæгъы ног æнтыстдзинæдтæ ахуырад æмæ наукон архайды, – загъта амынд факультеты декан Геннадий Родионов.
Биноныг куысты фæрцы адæймаджы къухы æнтыстдзинæдтæ кæй бафтдзысты, Цæгат Ирыстоны æппæт студенттæн фæзминаг Аидæйы уæлахиз ууыл дзурæг у.
Цæгат Ирыстоны паддзахадон университеты пресс-службæ
