РЦИ-Аланийы Хицауады Сæрдар Дзанайты Барисы разамындæй уыд Инвестициты фæдыл республикон советы радон æмбырд. Фембæлды архайджытæ æрдзырдтой цалдæр социалон æмæ экономикон инвестицион проекты царды рауадзыныл.
Зæгъæм, компани «Æнæххæст бæрнондзинады æхсæнад «ЭКС» фæнд кæны Мæздæджы районы агропромышленнон комплекс саразын. Проекты тыххæй бæстон радзырдта компанийы æххæстгæнæг директор Олег Яровой. Компанийы минæвары ныхасмæ гæсгæ, арæзт æрцæудзæн нырыккон техникон фæрæзтæй ифтонггонд нырыккон агропромышленнон холдинг. Ног куыстуаты архайды сæйрагдæр нысантæ уыдзысты агропромышленнон продукци æлхæнын æмæ уыцы хомагæй хæрзхъæд продукци уадзын.
Олег Яровой куыд бафиппайдта, афтæмæй компани цæттæ у 2023 азы ног комплексы арæзтадмæ бавналынмæ. Куыд нысангонд цæуы, афтæмæй 2024 азы ног комплекс хъуамæ æппæт хъарутæй скуса. Кæй зæгъын æй хъæуы, амынд проекты фæрцы районы фæзындзæн уæлæмхасæн кусæн бынæттæ, сырæздзысты бынæттон бюджеты æфтиæгтæ. Уыцы æууæл, кæй зæгъын æй хъæуы, хорзæрдæм сахаддзæн агропромышленнон комплексы рæзтыл.
Советы уæнгтæ хорзыл банымадтой компани «ЭКС»-ы инвестицион хъæппæрис.
Дарддæр æмбырды архайджытæ æркастысты Дзæуджыхъæуы егъау базарадон-хиирхæфсæн центры арæзтады проектмæ. Ацы проект советы уæнгтæн бавдыста компани «Перспективные технологии»-йы генералон директор Хъараты Анзор. Йæ ныхасмæ гæсгæ, фидæны центр æрбынæттон уыдзæн 25 мин квадратон метры бæрц фæзуатыл, йæ архайды сæйрагдæр нысан уыдзæн арæзтадон-цалцæггæнæн æрмæджытæ уæй кæнын. Хъарайы-фырт куыд фæнысан кодта, афтæмæй центры проектæн хорз аргъ скодтой специалисттæ — хыгъд дзы æрцыдысты æппæт нырыккон арæзтадон-техникон домæнтæ дæр. Инвестицион проекты иумæйаг аргъ у 1,4 миллиард сомы бæрц.
Советы уæнгтæ æркастысты æндæр проекттæм дæр.
— Мах алкæддæр рахæцдзыстæм цымыдисаг æмæ экономикон æгъдауæй пайдайаг бизнес-проектты фарс. Уыцы нысанмæ сæ ных сарæзтой Инвестициты фæдыл советы æппæт уæнгтæ дæр. Цæгат Ирыстоны Сæргълæууæг Сергей Меняйло хицауады æххæстгæнæг оргæнты бæрнон кусджыты размæ цы нысантæ æвæры, уыдонæй иу хъуамæ уа амалхъомады райрæзтæн æппæтвæрсыг æххуыс. Уыимæ, ног проекттыл дзургæйæ, æнæмæнг, хъуамæ сæйрагдæр уой ног кусæн бынæттæ гом кæныны æмæ бюджетмæ фылдæр хъалонтæ æрвитыны æууæлтæ. Æппæт фадæттæй дæр архайын хъæуы, цæмæй нæ республикæйы амалхъомадон компанитæ сæ инвестицион проекттæ æнтыстджынæй æххæст кæной, — æмбырды кæронбæттæны бафиппайдта Дзанайты Барис.
РЦИ-Аланийы Сæргълæууæджы
æмæ Хицауады пресс-службæ
