Хуссарирыстойнаг фабрик «Барс» фæлварæны хуызы Уæрæсемæ арвыста хъæдæрмæгæй конд продукци. Фæстæмæ райстой уыцы товартæ ногæй рарвитыны курдиат.
Фабрикы генералон директор Босыкты Владимир куыд радзырдта, афтæмæй сæ продукци фæцыд фæдзæхсæджы зæрдæмæ, бафыстой бадзырд, уымæ гæсгæ хъæды продукци æрвитыны хъуыддаг бантыст. Куыд ма загъта, афтæмæй продукцийы ацы хуыз фæцыд китайаг æмæ белорусаг фирмæты зæрдæмæ. Тагъд сæ минæвæрттæ фæзындзысты Цхинвалмæ, базонгæ уыдзысты «Барс»-ы куыстадон технологитимæ, хъæдæй конд продукци исыны фæткимæ.
«Кæимæ кусдзыстæм, уыдонæн миграцион службæйы ‘рдыгæй райстам хуынды гæххæттытæ. Продукцийы ног хуызтæ ацы бонты хъуамæ арвитæм китайаг компанимæ дæр», – фæбæрæг кодта Босыкы-фырт. Фарон, ноябры, фабрик Уæрæсемæ æрвитын райдыдта тæрсы хъæдæй конд хус фæйнæджытæ. Ацы аз та куыстуат сæвæрдта ног ифтонггæрзтæ, уыдоны руаджы сæм фæзынд хъæды ног продукт. Сæ бон уадзын у вагонкæ, пъолтæн фæйнæджытæ, дуæрттæ, хъæдын лыстæг дзаума æмæ æндæр товартæ.
«Барс»-ы хъомыс ахæм у, æмæ йæ бон мæймæ у тæрсы фæйнæджы 1000 кубометры уадзын, хъæдын дзаумайы 200-300 кубометры исын. Сæ зæрды ис тæрсы фæйнæджы бæрц сабыргай фæкъаддæр кæнын, хъæдын дзаумайы бæрцыл та бафтауын. Босыкты Владимир куыд радзырдта, афтæмæй æддагон æмгуыстгæнджытæн тæрсы фæйнæг нал æрвитдзысты, рахиздзысты хъæдæрмæджы арф бакуыстмæ. Уаддзысты хъæдæй дзаума, вагонкæ, дуæрттæ æмæ æндæртæ.
Ныртæккæ «Барс»-ы кусынц 60 адæймаджы, æппынкъаддæр мызды у 50 мин сомы. Генералон директор куыд æмбарын кæны, афтæмæй сæм мыздæй хæстæ фæзынд, фæлæ сæ клиенттæ фæфылдæр уыдзысты, сæ фæдзæхстытæ парахатдæр кæндзысты, æмæ мызды хæстæ дæр фесæфдзысты. «Нæ куыстуат нырма æрыгон у, æнæмæнг, фæзынынц алыхуызон цæлхдуртæ, къуылымпытæ, фæлæ нæ бон сæ сæрты ахизын у. Ногдзинæдты фæрцы уыдзæн ног кусджытæ райсыны гæнæн, сæдæйы онг суыдзысты. Уæд мызд дæр фæфылдæр уыдзæн», – загъта фабрикы генералон директор.
Фарон фабрикмæ ‘рцыдысты ВТБ-банкæй, сбæрæг кодтой, æфстæуттæ куыд хардзгонд æрцыдысты, уый. Разыйæ баззадысты сæ бæрæггæнæн куыстæй, фабрикы хæдзарадон-финансон архайдæй. «Алания-Лес»-ы организаци хъæдæрмæджы фабрик саразыны проект рæгъмæ рахаста фарон, объект ис Цхинвалы кæрон. Проекты иумæйаг аргъ у 720 милуан сомы. Æхцайы фылдæр хай æфстæутты хуызы райстой уæрæсейаг банкæй. Хæрдзтæ аст азмæ æхгæд æрцæудзысты, бюджетмæ азы дæргъы æфтдзæн 49 милуан сомы.
Уалыты Гугули
