Зындгонд куыд у, афтæмæй ивгъуыд къуыри Уæрæсейы Президент Владимир Путин Мæскуыйы фембæлд Китайы разамонæг Си Цзиньпинимæ. Нæ бæстæйы Президент бафиппайдта дыууæ бæстæйы ‘хсæн фидардæргæнæг базарадон бастдзинæдтæ, уæрæсейаг-китайаг экономикон ахастыты рахæцæнтæ 2030 азмæ фæбæрæг кодта.
Уæрæсейаг разамонæджы ныхасмæ гæсгæ, Китай у нæ бæстæйы æддагон-базарадон æмкусæг. Хъуамæ дыууæ бæстæйы ацы аз базарады ахизой 200 миллиард сомы бæрцы сæрты, Уæрæсе Китаймæ фылдæр æрвитдзæн хойраджы продукци. Иумæ хъавынц саразын Цæгатаг денджызон фæндаджы рæзты кусæг оргæн. Владимир Путин куыд загъта, афтæмæй Уæрæсе æмæ Китайы бон у информацион технологиты æмæ аразгæ интеллектæй дунейы раздзогтæ суæвын.
Владимир Путин æмæ Си Цзиньпин сæ хицауадтæн бахæс кодтой бацæттæ кæнын уæрæсейаг-китайаг экономикон æмгуыстады пълан 2030 азмæ. Рахицæн кодтой аст ахсджиаг рахæцæны, семæ сты базарады æмæ финасон кооперацийы, энергетикæйы рæзт, промышленнон коопераци, хъæууон хæдзарады æмгуыстады æмвæзад фæбæрзонддæр кæныны нысантæ.
Цæгат Ирыстоны Æхсæнадон палатæйы уæнг, республикæйы сгуыхт экономист Цориты Алетæ куыд фæбæрæг кодта, афтæмæй дыууæ бæстæйы ‘хсæн экономикон æмгуыстадæн ис стратегион ахадындзинад. «Дыууæ бæстæйы иудзинад зынгæ фæбæрæг уыдзæн Америчы фарс хæцджыты диктатыл, фашизм нал фидар кæндзысты, дунейы цæрæг адæмты традицион æмæ историон хæзнатæ нал халдзысты, сæ экономикæ хæлд нал цæудзæн.
Ныры цауты ахадындзинад фæсарæйнаг бæстæты разамонджытæ фæстæдæр бамбардзысты, дунеон культурæ æмæ экономикæ кæд уæдмæ хæлд не ‘рцæуиккой. Мах та ныртæккæ дыууæ бæстæйæн стæм сабырдзинад æмæ стратегион рæзтыл архайды æвдисæнтæ», — загъта Цориты Алетæ. Куыд ма бацамыдта, афтæмæй Китай æмæ Кавказы ‘хсæн базарадон-экономикон ахастыты истори сæдæгай азтæ ахсы. Зæгъæм, Цытджын зæлдаг фæндаг.
Цæгат Ирыстон Китайы алыхуызон регионтимæ куыста, зæгъæм, 2009 азы, Уæрæсе æмæ Китайы ‘хсæн базарадон-экономикон форумы фæлгæты бафыстой регионы æмæ провинци Сычуаньы ‘хсæн бадзырд.
«Республикæйы фæзынд Китайы Адæмон республикæимæ базарадон-экономикон æмгуыстады центр. Республикæйæ Китаймæ æрвыст цæуы нуазыны дон, бæгæны, карз нозт, хойраджы товартæ. Дыууæвæрсыг ахастытæ рæзты фæндагыл кæй сты, уый нын фадат дæтты Китайы провинцитимæ æмгуыстадæн», — зæгъы эксперт.
Нæ уацхæссæг
