Ӕрвылаз дӕр июны дыккаг къуырийы кӕрон ӕппӕт ӕхсӕнад дӕр сбӕрӕг кӕны Доноры дунеон бон.
Фӕлӕ йӕ канд медиктӕ кӕнынц бӕрӕг кӕнӕ фарстамӕ адӕмы ӕргом ӕрмӕст уыцы бон здахгӕ у, зӕгъгӕ, куы зӕгъӕм, уӕд уый раст нӕ уыдзӕн, уымӕн, ӕмӕ ацы бонӕн йӕ ахадындзинад у ӕгӕрон: туг чи радты, уыцы адӕймаг рынчынӕн скӕны диссаджы лӕвар — йӕ тугимӕ иумӕ йын йе уӕнгты бауадзы цӕрыны ныфс. ӕмӕ уыцы лӕварӕн аргъ нӕй.
Уымӕ гӕсгӕ, Уӕрӕсейы Сырх Дзуары цӕгатирыстойнаг регионалон хайад Тугдӕттыны республикон станцӕ ӕмӕ змӕлд «Медиктӕ-волонтертӕ»-имӕ иумӕ уыцы боны нысанӕн алы аз дӕр саразынц донорон акци. Туг радтын у алкӕй бон дӕр, ӕрмӕст адӕймаг хъуамӕ уа ӕнӕниз. Хӕцгӕ низтӕй ӕрӕджы рынчын чи уыд, кӕнӕ ӕрӕджы операци чи скодта, кӕнӕ онкологи ӕмӕ ӕндӕр уӕззау низтӕ кӕмӕ ис, уыдонӕн, кӕй зӕгъын ӕй хъӕуы, туг дӕттӕн нӕй.
Ацы аз Тугдӕттыны дунеон бон туг радтой 50 адӕймагӕй фылдӕр. Уыдонӕй уыд ӕмӕ туг фыццаг хатт лӕвӕрдта Хӕххон-металлургон институты студент, Уӕрӕсейы Сырх Дзуары цӕгатирыстойнаг регионалон хайады бархион Созӕты Раман. «Туг радтон фыццаг хатт, фӕлӕ йӕ амӕй фӕстӕмӕ дӕтдзынӕн рӕстӕгӕй-рӕстӕгмӕ. Фӕнды мӕ донор суӕвын», — зӕгъы лӕппу.
Фыццаг хатт радта туг Цӕгат Ирыстоны паддзахадон медицинон академийы студенткӕ Санахъоты Дианӕ дӕр. Чызг дӕр у «Медиктӕ-волонтертӕ»-йы регионалон змӕлды координатор ӕмӕ архайы туг дӕттыны хъуыддаг ӕхсӕнады парахат кӕныныл. «Донор суӕвын мӕ рагӕй фӕндыд, фӕлӕ мын нӕ уыд уыцы гӕнӕн, мӕ туджы ӕлхъывдад-иу ӕгӕр ныллӕг кӕй уыд, уымӕ гӕсгӕ. Абон та мӕм дохтыр ӕркаст, ӕмӕ ме ‘нӕниздзинадмӕ ницы фиппаинаг ссардта. Ныр мӕ амондӕн кӕрон нӕй! Уӕззау рынчыны туг куы бахъӕуы, ахӕм цаутӕ, хъыгагӕн, сты арӕх, ӕмӕ мӕ фӕнды, цӕмӕй тугдӕттӕг адӕймӕгтӕ кӕной фылдӕр. Уый у хуымӕтӕг медицинон фӕрӕз, уыимӕ, бынтон ӕдас», — ӕмбарын кӕны Дианӕ.
— Абон медицинӕ стыр санчъехтӕй цӕуы размӕ, фӕлӕ дзы тугӕн баивӕн ницӕмӕй ис, уымӕ гӕсгӕ туг дӕттыны хъуыддаг хъӕуы парахат кӕнын, ӕмбарынгӕнӕн куыст адӕмимӕ фылдӕр кӕнын, — дзуры Тугдӕттыны республикон станцӕйы сӕйраг дохтыр Цхуырбаты Дианӕ. — ӕнӕ донорӕй махӕн кусӕн нӕй, уымӕ гӕсгӕ стыр ӕргом здахӕм, сӕ нымӕц фылдӕр цӕмӕй уа, уымӕ ӕмӕ аразӕм акцитӕ, алыхуызон бӕрӕгбӕттӕ, кӕнӕм сын зӕрдӕлхӕнӕнтӕ.
Тугдӕттӕг адӕймӕгтӕ фылдӕр кӕнынмӕ йе ‘ргом здахы Уӕрӕсейы Сырх Дзуары Цӕгат Ирыстоны регионалон хайад дӕр.
— Туг ӕмӕ стджыты магъз дӕттыны хъуыддаг парахат кӕнын у нӕ куысты сӕйрагдӕр фӕзилӕнтӕй иу. Уыцы нысанимӕ республикӕйы уӕлдӕр ахуыргӕнӕндӕтты, кусӕнуӕтты иудадзыгдӕр аразӕм рухстауӕн мадзӕлттӕ, фӕсивӕдӕн ӕмбарын кӕнӕм туг дӕттыны ахсджиагдзинад, — зӕгъы Уӕрӕсейы Сырх Дзуары цӕгатирыстойнаг регионалон хайады сӕрдар Хъуысаты Иринӕ.
Ацы аз тугдӕттыны акцийы чи бацархайдта, уыдон лӕварӕн райстой алыхуызон зӕрдӕлхӕнӕнтӕ ӕмӕ, кӕй зӕгъын ӕй хъӕуы, хъуыддаг саразджыты арфӕйы ныхӕстӕ.
ДЖИГОЛАТЫ Зӕлинӕ,
Уӕрӕсейы Сырх Дзуары Цӕгат Ирыстоны хайады пресс-службӕ
