Фыссæг-эмигрант Гæздæнты Гайтойы номыл фæткъуы Цæгат Ирыстоны хорз ныффидар æмæ ныридæгæн фыццаг чысыл тыллæг радта.
Уый тыххæй фехъусын кодта проекты автор Станислав Стасенко. Уый куыд фæбæрæг кодта, афтæмæй фæткъуыйы ног гибридон сорт æппæт бæрæггæнæнтæм гæсгæ дæр йæхи хорзæй равдыста. Йæ сæйрагдæр хорздзинад ис йæ бæрзонд тыллæгæрзады, тагъд цæттæкæнынады, низтæм иммунитеты, дыргъты бæрзонд рауагъды, стæй тæвд æмæ уазалæн быхсындзинады.
Сортæн фæлварæн сарæзтой Цæгат Ирыстоны куыстуат «Де-Густо»-йы бындурыл, уым ын æрхъуыды кодтой ном дæр.
«Ацы аз сбæрæг кодтам ахсджиаг цау — Гæздæнты Гайтойы 120 азы. Рагæй йын кæсæм æмæ стыр аргъ кæнæм йе сфæлдыстадæн, сæрыстыр стæм, Ирыстоны хъæбул кæй уыд, уымæй. Уымæ гæсгæ, нæ разамонæг Дзиццойты Риммæ бахаста фæндон йæ номыл фæткъуыйы ног сорт рахонын», — фæбæрæг кодта компанийы финансон директор Хъуылымбегты Жаннæ. Йæ ныхæстæм гæсгæ, промышленнон æгъдауæй фæткъуыйы талатæ тыллæг дæттын 2026 азæй раздæр нæ райдайдзысты
Фæткъуыйы ног сорт «райгуырд» Цæгат-Кавказы федералон наукон дыргъдарæн центры Краснодары. Селекционертæ йыл куыстой дæс азæй фылдæр. Сæ къухы бафтыд, “Голден Делишес” æмæ “Либерти”-йы сорттæн гибридизаци саразгæйæ. Уый ратдзæн фадат хæрзхъæд дыргътæ исын бæрзонд тыллæгæрзадæй. Низтæм иммунитеты руаджы та йæ уæй кæныны аргъ дзæвгар ныллæгдæр уыдзæн, алыхуызон хостæй йæ кæй нæ пырх кæндзысты, уый фæстиуæгæн.
Уæ зæрдыл уын æрлæууын кæндзыстæм, 6 декабры зындгонд фыссæг Гæздæнты Гайтойы райгуырды боныл кæй сæххæст 120 азы.
Гапбаты Алетæ
