РЦИ-Аланийы Хицауады Сæрдар Дзанайты Барис архайдта, Уæрæсейы Федерацийы вице-премьер Дмитрий Чернышенко Мæскуыйы цы селекторон æмбырд сарæзта, уым. Ныхасы сæйраг темæ уыд иумæйаг, астæуккаг профессионалон æмæ уæлдæр ахуырадон уагдæтты цæттæдзинад ног 2026/2027 ахуыры азмæ.
Мадзалы архайдтой Уæрæсейы рухсады министр Сергей Кравцов, наукæ æмæ уæлдæр ахуырады министры хæдивæг Елена Тумакова, Уæрæсейы субъектты сæргълæуджытæ, регионалон оргæнты ахуырады управлениты разамонджытæ, Президенты Æххæстбарджын минæвæрттæ федералон зылдты. Цæгат Ирыстоны студийæ ма видеобастдзинады руаджы æмбырды архайдтой дзуапдæттæг министрадтæ æмæ ведомствæты разамонджытæ.
Дмитрий Чернышенко сæрмагонд æргом аздæхта сывæллæттæ æмæ инфраструктурæйы æдасдзинадмæ, кадртæ æмæ ахуыргæнæн чингуытæ фаг ис æви нæ, стæй кадджын линейкæтæ куыд арæзт цæудзысты, уыцы фарстатæм.
Алы сывæллоны æдасдзинад дæр сæйраг хъуыддаг у, æмæ ууыл иумæ кусынц Мидхъуыддæгты министрад, Уæрæсейы гварди æмæ регионтæ.
– Президент Владимир Путин бафыста ахуыргæнджытæн уæлæмхасæн æххуысы мадзæлтты тыххæй Указ. Ныр уыцы мадзæлттæ регионты практикон æгъдауæй хъуамæ æххæстгонд цæуой. Курын ахуырады регионалон оргæнтæй уыцы фарстамæ иудадзыг цæст дарын, – загъта вице-премьер.
Дарддæр ноггонд цæуы ахуырадон инфраструктурæ – сывæллæтты рæвдауæндæтты, скъолатæ, колледжтæ æмæ уæлдæр ахуыргæнæндæтты. Дмитрий Чернышенко фæбæрæг кодта, Михаил Мишустины разамындæй Хицауад кæдæй кусы, уæдæй нырмæ арæзт кæй æрцыд 1,7 мин скъолайы. Сæрмагонд цæстдард цæуы университеттæ æмæ студентты æмдзæрæнты инфраструктурæйы модернизацимæ.
Дмитрий Чернышенко регионты разамонджытæн бафæдзæхста æппæт цæттæгæнæн мадзæлттæ дæр ахуыры азы райдайæнмæ фæуын, линейкæтæ æмбæлгæ уавæрты саразын, скъолаты чингуытæ фаг ис æви нæ, уый сбæлвырд кæнын.
Рухсады министр Сергей Кравцов фехъусын кодта, цæттæ кæй сты ахуыры азы райдайæнмæ.
– Зонындзинæдты бонмæ ма цалдæр боны баззад. Ахуырады системæ, æмткæй райсгæйæ, ахуыры азы райдайæнмæ цæттæ у. Уынæм, ахуыргæнджыты ваканситæ дæр гыццылдæр кæй кæнынц. «Роструд»-ы бæрæггæнæнтæм гæсгæ, сæ нымæц фæкъаддæр 1,1 проценты бæрц, фаронимæ абаргæйæ, – фæбæлвырд кодта Сергей Кравцов.
РЦИ-Аланийы Хицауады Сæрдар Дзанайты Барис загъта, нæ республикæйы ахуырадон уагдæттæм сæрмагонд цæстдард кæй ис:
– Цæгат Ирыстон ахуыры азы райдайæнмæ цæттæ у. Иудадзыг лæмбынæг каст цæуы æдасдзинад æмæ ахуырады хъæды фарстатæм. Сæ цæттæдзинад сын сбæлвырд кодта сæрмагонд къамис. Предметон кабинетты ис хъæугæ интерактивон ифтонггæрзтæ, компьютертæ, бирæфадатджын арæзтытæ (устройства). Æппæт скъолаты дæр ис тæвд хæринаг саразынæн хъæугæ уавæртæ, – загъта Дзанайты Барис.
Уымæй уæлдай, национ проект «Фæсивæд æмæ сывæллæттæ»-йы фæлгæты республикæйы дарддæр цæуы егъау куыст скъолатæ æмæ рæвдауæндæтты бындурон цалцæгыл.
Дзанайты Барис ма загъта, Дзæуджыхъæуы 24 августы кæй ацыд ахуыргæнджыты августон конференци. Республикæйы Сæргълæууæг Сергей Меняйлойы уынаффæйæ къорд хъæппæрисы æххæстгонд цæудзысты. Уыдонимæ – республикон программæ «Ахуыргæнæг – дæ фарсмæ» уый æрыгон ахуыргæнджытæн методикон амынддзинæдтæ райсынæн сæ куысты фæлтæрдджын ахуыргæнджытæй. Уымæй уæлдай ма загъта, саразын кæй хъæуы «Пушкины картæ»-йы халдих – регионалон программæ «Хетæгкаты Къостайы картæ».
ГАПБАТЫ Алетæ
