Æрвылбон мæ къухмæ мæ уарзон газет «Рæстдзинад» куы райсын æмæ фыццаг фарсыл куы бакæсын нæ ирон газеты редакцийы æрвыстæг: «Рафыссæм газет «Рæстдзинад» 2024 азы дыккаг æмбисæн», зæгъгæ, уæд та сагъæс кæнын райдайын нæ иунæг ирон газеты хъысмæтыл. Бæргæ, мæ пенсийы капеччытæй мæ бон куы уаид мæ дзурæг æмбалы тираж фæфылдæр кæнын, уæд сыл нæ бацауæрдин. Фæлæ мæ авналæнтæ цыбыр сты. Æмæ бахатын, нæ алыварс цы бирæ коттеджтæ ис, уыдоны хицæуттæм, цæмæй хистæр кары адæмæй иу-цалдæрæн сæхи хардзæй рафыссой газет «Рæстдзинад». Фæлæ сæ иуæй-иутæй зымæгон бон мит дæр нæ рантысдзæн. Сæхи афтæ ныммæгуыр кæнынц, æмæ сын тæригъæд дæр бакæндзынæ.
Фæлæ, дам, дуне æнæ зæрдæхæлар адæм нæу! Нæ сыхæгтæй разынд цæстуарзон, рæдау амалхъомтæ. Уыдон алкæддæр кæнынц бынæттон администрацийæн дæр æмæ сæ алыварс цæрджытæн дæр алывæрсыг æххуыс-
тæ, кæддæриддæр цæттæ сты фæкæсынмæ. Уыдонæй иу у куыстуат «Панорама». Æнæ уæлдай ракæ-бакæйæ рафыстой 10 газеты. Ацы хуыцауысконд адæймæгтæн нæ ирон газет «Рæстдзинад»-ы руа-
джы бузныджы ныхæстæ загътон.
Æрæджы та бахатыдтæн организаци «Роза ветров»-ы разамындмæ. Йæ генералон директор Бæдзойты Лирæ æу-
уæнкджын, сыгъдæгзæрдæ, бæркадкъух, рæдау сылгоймаг у. Никуы никæуыл атигъ кæны йæхи. Никуы ракæсы куыдфæндыйы цæстæй тыхст адæймагмæ. Йе ‘ххуысы хай бахæссы кæмæнфæнды дæр. Бирæ æххуыстæ дзы зонынц бынæттон администрацийы сæргълæууæг Гуыриаты Валери æмæ скъолайы сæргълæууæг Дзуццаты Людмилæ. Лирæйы æххуысæй Валери æмæ Людмилæйæн сæ къухы бафтыд бирæ лыггæнинаг фарстатæ банывыл кæнын. Се ‘ппæт нæ нымайдзынæн, фæлæ сæ тæккæ ахсджиагдæр у, бирæуæладзыгон хæдзæртты нывылгонд кæй æрцыд нуазыны доны сыгъдæг æмæ фагдзинад. Ницы бавгъау кодта Лирæ ацы æнæмæнг, æвæстиатæй кæнинаг хъуыддагæн. Гъемæ, доны арæхæн уæд йæ цард!
Æз куы бацыдтæн мæ курдиатимæ, уæд Лирæ йæхæдæг уым нæ уыд, фæлæ мыл зæрдиагæй сæмбæлд йæ чызг, ацы куыстуаты коммерцион директор Хуриты Даринæ. Йæ кусæнуаты къæсæрæй куыддæр бахызтæн, афтæ мын сыстад, мидбылхудгæйæ мын «æгас цу» загъта. Уый æмæ, йæхицæн нæ саккаг кодта хистæры раз сбадын æмæ, мемæ бадгæйæ, дзурын. Йе ‘фсарм, йæ хæрзæгъдаудзинадæй мæ йæхимæ æркæсын кодта, аив – йæ уынд, йæ дарæс, йæ ныхас. Кæйдæртау мæм æнæрвæссон каст нæ ракодта. Бæстон æмæ мæм лæмбынæг байхъуыста. Æгæрон уыд æмæ у мæ цымыдисдзинад йæ хæрзуд, йæ хæрзахуырдзинадыл. Уæзданæй мын бамбарын кодта, мæ курдиат æнæмæнг æххæстгонд кæй уыдзæн. Æмæ уайтæккæ дæр рахызт ныхасæй хъуыддагмæ. Йе ‘ххуысгæнджытæн бабар кодта хъуыддаг. Рафыстой газеты дыууадæс экземпляры. Дыууадæс æвæрæз хистæрыл баузæлыдысты, барæвдыдтой сæ – алкæмæндæр зæрдиагæй балæвар кодтой газет «Рæстдзинад». Ай-гъай, у æгæрон сæ бузныг комбæсты хистæртæн. Æмæ куыннæ, ныр сæм æрвылбон нæ иунæг ирон адæмон газет хæсдзæн фарны хабæрттæ!
Мæхи æмæ комбæсты хистæрты номæй стыр бузныг зæгъын, æнæххæст бæрнондзинады организаци «Роза ветров»-ы генералон директор Бæдзойты Лирæйæн, æрыгон, уæздан Даринæйæн æмæ амы хæрзæгъдау кусджытæн. Зынаргъ Лирæ æмæ Даринæ, Хуыцау уæ зæххон хæрзтæй хайджын кæнæд! Фидар æнæниздзинад уын балæвар кæнæд! Уæ исыл кæддæриддæр ис æфтæд! Амалхъом æмæ æххуысхъом ут! Цæстуарзонæй адæмыл кæй схардз кæнут, уыдон уæм-иу æрвылбон авд хатты фылдæрæй здæхæнт!
ФÆРНИАТЫ Рая,
Уæллаг Фыййагдон
