«Картоф. Халсартæ. Дыргътæ» – ахæм равдыст ныр дыккаг хатт сарæзтой Мæскуыйы равдыстыты центр «Крокус-Экспо»-йы. Ныхас дзы цæуы картоф, халсартæ æмæ гагадыргътæ æрзайын æмæ бакусыны нырыккондæр технологитыл. Цæгатирыстойнаг компани «Фат-Агро» дзы æвдисы хи конд селекцийы картофы хуызтæ «Садон» æмæ «Спринтер».
Зæхкусджытæ æмæ ахуыргæндтæ цымыдисæй зонгæ кæнынц картофы ног хуыз «Алани»-имæ дæр. Æнæмæнг, ацы азы селекцион æнтыстдзинад паддзахадон реестрмæ хаст æрцæудзæн. «Равдысты архайджытæн хорз фадат ис алы фарстатыл аныхас кæнынæн, картофы мыггаг самал кæнынæн, дæргъвæтин контракттæ бафыссынæн», – фехъусын кодта компани «Фат-Агро»-йы минæвар.
Хæрын æмæ садзыны картофимæ баст сæйрагдæр фарстатыл ныхас кæндзысты цалдæр боны. Фысымтæ бацæттæ кодтой хъæздыг æмæ хъуыддаджы хорз программæ.
Нæ уацхæссæг
