РЦИ-Аланийы Хицауады Сæрдар Дзанайты Барис скодта республикон бюджетон къамисы æмбырд æмæ æрдзырдта 2026 азы финансон документ æмæ 2027-2028 азты бюджеты проект аразыны тыххæй.
Дзанайы-фырт куыд фæбæрæг кодта, афтæмæй финансон документы сæйрагдæр уыдзæн мызд афоныл фидыны, æгуыст адæмæн Æнæмæнг медицинон фæдзæхстады фондмæ фиддонтæ барвитын, сæрмагонд æфсæддон операцийы архайджытæм, сæ бинонтæм пособитæ æмæ æххуыс хæццæ кæнын. Дарддæр дæр ахуырад, культурæйы кусæндæттæн, скъолайы агъоммæйы хъомыладæн, национ проекттæн фæрæзтæ лæвæрд цæудзысты.
Финансты министры фыццаг хæдивæг Оксанæ Каровайы ныхасмæ гæсгæ, бюджет фидаргонд æрцæудзæн Уæрæсейы Федерацийы Бюджетон кодексы домæнтæм æмæ регионы бюджетон процессы тыххæй закъонæвæрынадмæ гæсгæ. 2026-2028 азты бюджеты хæрдзтæ лæвæрд цæудзысты социалон хæстæн, ахуырады, æнæниздзинады къабæзтæн, национ проекттæ æмæ паддзахадон программæты нысантæ инфраструктурæйæ баххæст кæнынæн.
Хицауады Сæрдар бафæдзæхста разамонджытæн, цæмæй цыбыр æмгъуыдтæм
хæрдзтæ сбæрæг кæной, уæлдайдæр – социалон къабазы. Нормативон-барадон бындуртæ рæгъмæ рахæссой æмæ бындур кæмæн уа, ахæм нымæцтæ сбæрæг кæной – афтæмæй республикон бюджетыл кусæн уыдзæн. Дзанайы-фырт куыд бацамыдта, афтæмæй республикæйы Финансон ведомствæ хъуамæ амона, методикон æххуыс кæна, цæмæй фидæны бюджет æнаиппæй, нывылгондæй æххæстгонд æрцæуа.
Æмбырды архайджытæ сразы сты республикæйы 2026-2028 азты бюджеты тыххæй закъоны проект бацæттæ кæныны графикимæ. Тагъд республикон бюджетон къамис бавналдзæн уыцы куыстмæ
РЦИ-Аланийы Сæргълæууæг æмæ Хицауады пресс-службæ
