Сæрмагонд федералон проект «Хистæр фæлтæр»-ы фæрцы уæлæмхасæн социалон æмæ медицинон лæггæдтæй зæрдиагæй пайда кæнынц 30 мин цæгатирыстойнаг ацæргæ адæймагæй фылдæр.
Ахæм нымæцтæ «Рæстдзинад»-æн фехъусын кодтой РЦИ-Аланийы Сæргълæууæг æмæ Хицауады пресс-службæйы.
Амынд проекты фæрцы хистæр фæлтæры минæвæрттæн се ’рвылбоны цард кæны ирддæр æмæ цымыдисагдæр. Афтæ, социалон лæггæдты центрты специалисттæ ацæргæ адæмæн аразынц сфæлдыстадон, компьютерон æмæ спортивон мастер-класстæ, аласынц сæ бæстæзонæн экскурситæм, фæхонынц сæ концерттæм…
Дохтыртæ æмæ иннæ специалисттæ алкæддæр цæттæ вæййынц хистæртæн се ‘нæниздзинад фæфидардæр кæнын æмæ реабилитацийы æндæр мадзæлттæ саразынмæ (уыимæ, ахæм лæггæдтæ мобилон къордтæ æххуысхъуаг адæмæн кæнынц йæ цæрæн бынаты дæр).
Ахæм адæммæ хæдзармæ бацæуынц социалон службæйы кусджытæ дæр – фæкæсынц сæм хæдзары змæлдтытæм, бадæттынц сын хойраг æмæ хостæ… Зæрдæбын ныхас дæр акæнынц семæ – уый дæр цæй аргъ у, уынгмæ зынтæй чи рацæуы, ахæм ацæргæ адæймагæн…
КАЛМАНТЫ Аслан
