РЦИ-Аланийы Сæргълæууæг Сергей Меняйло фембæлд Дзæуджыхъæуы бирæкъабазджын техникумы директор, сæрмагонд æфсæддон операцийы архайæг Дзгойты Станиславимæ.
Республикæйы разамонæг арфæ ракодта Станиславæн, ахуыргæнæндоны директоры бынаты нысангонд кæй æрцыд, уый фæдыл æмæ фæбæрæг кодта, йæ бæрзонд фæл-
тæрддзинад æмæ профессионализм ын æххуыс кæй уыдзысты, йæ размæ цы нысантæ сæвæрдта, уыдон сæххæст кæнынæн æмæ техникум ног рæзты æмвæзадмæ сисыны
хъуыддаджы.
– Мах рагæй зонгæ стæм. Ды архайдтай батальон «Алания»-йы равзæрды. Дæ бæрзонд фæлтæрддзинадæй мидхъуыддæгты оргæнты, арæзтад æмæ транспорты къабæзты æнтыстджынæй пайда кодтай дæ æрвылбоны архайды. Мæн уырны, уыцы зонындзинæдтæ дын дæ ног бынаты уæлæмхасæн бындур кæй уыдзысты, уый, – загъта Сергей Меняйло.
Дзгойты Станислав бузныг загъта республикæйы разамонæгæн йе ’ууæнкдзинады тыххæй æмæ бафиппайдта, æппæт хъарутæй дæр кæй архайдзæн ахуырадон уагдоны разамынды.
Дзæуджыхъæуы бирæкъабазджын техникумы директормæ бирæ фæндтæ ис: ахуырады уагдоны бæстыхайы бындурон цалцæг æмæ автоскъолайы рæзт. Ныртæккæ дзы ахуыр кæнынц 455 студенты. Дзгойты Станислав фæнд кæны студентты нымæц фæфылдæр кæнын, абитуриенттæн се ’ргом раздахын цымыдисаг программæтæм æмæ сын диплом райсыны фæстæ куысты бынæттæ ссарын.
– Ацы аз нæ студентты нымæц у 92 проценты, уый хорз бæрæггæнæн у. Фæлæ нæ куыст хъуамæ ноджы хуыздæр кæнæм. Нæ зæрды ис студентты æргом алыхуызон мадзæлттæм раздахын. Зæгъæм, 16 октябрæй 17 октябрмæ техникумы ацæудзæн фæсивæдон арæзтадон форум «Аразæм Ирыстон». Студенттæн афтæмæй фадат уыдзæн сæхи равдисынæн. Куысты бынæттæ кæмæ ис, уыдон базонгæ уыдзысты студентты курдиæттæ æмæ дæсныдзинадимæ æмæ сæ сæхимæ кусынмæ ахондзысты, – радзырдта Дзæуджыхъæуы бирæкъабазджын техникумы директор.
Дзгойты Станислав ма республикæйы Сæргълæууæгæн фехъусын кодта, ахуырадон-хъомыладон процессмæ ног практикæ хаст кæй æрцыд – Хъæбатырдзинады æрвыл-
къуырион уроктæ студенттæн.
Сергей Меняйло фæндон бахаста ацы куысты спайда кæнын республикон программæ «Ирыстоны намыс»-ы архайджытæй, цæмæй диалоджы хуызы фæсивæдæн радзурой патриотизм æмæ Фыдыбæстæйы историйæн аргъ кæныны тыххæй.
Регионы разамонæг зæрдæ бавæрдта, алывæрсыгæй дæр кæй баххуыс кæндзæн, сæ размæ цы фæндтæ сæвæрдтой, уыдон сæххæст кæныны хъуыддаджы æмæ ма бафиппайдта, ахуырады рæзт республикæйы сæйрагдæр нысан кæй у, уый.
Хъойбайты Галинæ
