РЦИ-Аланийы премьер-министр ДЗАНАЙТЫ Барисы разамындæй уыд социалон-фæллойадон ахастдзинæдты фæдыл æртывæрсыг республикон къамисы радон æмбырд.
Фембæлды архайдтой Цæгат Ирыстоны Хицауады Сæрдары хæдивæг Платы Альбинæ, РЦИ-Аланийы Профцæдисты иугонды сæрдар Касаты Таймураз, Уæрæсейы Промышленниктæ æмæ амалхъомты цæдисы цæгатирыстойнаг хайады ра-
замонæг Хъодзаты Алан, хицаудзинады æххæстгæнæг оргæнты разамонджытæ.
Ацы азы скъоладзауты сæрдыгон фæлладуагъд æмæ æнæниздзинад фæфидардæр кæныны кампани куыд ацыд, уый фæдыл доклад скодта ахуырад æмæ наукæйы министр Алыбегты Эллæ. Йæ ныхасмæ гæсгæ, фæлладуадзæн æмæ æнæниздзинад фæфидардæр кæныны мадзæлттæ сæрды дæргъы аххæссыдысты 23 мин сывæллонæй фылдæрыл (уыцы нымæц, фаронимæ абаргæйæ, у 15 проценты фылдæр). 17 мин ахуырдзауы сæ фæллад суагътой, скъолаты цур цы лагертæ куыста, уыдоны. Респуб-
ликæйы цы стационарон фæлладуадзæн центртæ ис, уыдон та суазæг кодтой 5,6 мин лæппу æмæ чызджы. Уыдонæй уæлдай, ирыстойнаг сывæллæтты цалдæр къорды се ’нæниздзинад фæфидардæр кодтой Кавказаг Минералон Дæтты регионы санаторитæ æмæ Сау денджызы былгæрон лагерты.
Министр куыд фæбæрæг кодта, афтæмæй фыццаградон æргом здæхт æрцыд сæрмагонд æфсæддон операцийы архайджытæ æмæ цыбыркъух бинонты сывæллæтты фæлладуагъдмæ.
Фарстайæн хатдзæгтæ кæнгæйæ, Дзанайты Барис арфæ ракодта, сывæллæтты сæрдыгон фæлладуагъд æмæ æнæниздзинад фæфидардæр кæныны кампани аккаг хуызы арвитыныл чи бакуыста, æппæт уыцы бæрнон адæймæгтæн. Уыимæ, Хицауады Сæрдар бæлвырд амынддзинæдтæ радта профилон ведомствæты разамонджытæн, цæмæй рагагъоммæ æркæсой фидæн азы пълантæм, бацархайой фылдæр сывæллæтты сæрдыгон фæлладуагъд зæрдæзæгъгæ скæныныл.
Дарддæр къамисы уæнгтæ лæмбынæг æрдзырдтой социалон-фæллойадон ахастдзинæдтæ нывылдæр кæныны фарстатыл. Уыцы хъуыддаджы фæдыл уыд йæ раныхас Уæрæсейы Промышленниктæ æмæ амалхъомты цæдисы цæгатирыстойнаг хайады разамонæг Хъодзаты Аланæн. Хъодзайы-фырт куыд фæбæрæг кодта, афтæмæй куыстдæтджытимæ æмархайд цæуы рагагъоммæ фидаргонд пъланы бындурыл. Уыцы архайды бæстон хыгъд сты фæллойгæнджыты бартæ, закъонæвæрынады иннæ сæйрагдæр уагæвæрдтæ. Стыр æргом здæхт цæуы сæрмагонд æфсæддон операцийы архайджытæн куысты бынæттæ дæттыны фарстамæ дæр. Докладгæнæгмæ уыд ноджыдæр ма иу фиппаинаг: ныртæккæйы уавæрты организацитæ æмæ компанитæ фылдæр агурынц кусæг дæсныйæдты минæвæртты. Æмæ уыцы фарстайыл дæр профилон ведомствæтæ æмархайд кæнынц.
Къамисы уæнгтæ æрдзырдтой æндæр ахсджиаг фарстатыл дæр.
Æмбырдæн хатдзæгтæ кæнгæйæ, Дзанайты Барис загъта: «Республикæйы Сæргълæууæг Хицауады размæ цы сæйрагдæр нысантæ æвæры, уыдонæй иу у адæмы цардæн аккаг уавæртæ аразын. Уыцы хъуыддагыл комкоммæ ахадынц фæллойгæнджыты бартæ хъахъхъæныны, регионы инвестицион хъомыс ахадгæдæр кæныны, куыстадон компаниты архайд уæрæхдæр кæныны фарстатæ. Республикæ-
йæн æппæт фадæттæ дæр ис, цæмæй уыцы фарстатыл къæпхæнгай пайдайаг куыст цæуа».
РЦИ-Аланийы
Сæргълæууæг æмæ
Хицауады
пресс-службæ
