РЦИ-Аланийы Хицауады радон æрвылкъуырион аппаратон æмбырды сæрдариуæг кодта республикæйы Сæргълæууæг Сергей МЕНЯЙЛО. Архайдтой дзы Хицауады уæнгтæ, министрадтæ æмæ ведомствæты разамонджытæ, районты æмæ муниципалон скондты сæрдартæ. Ныхас кодтой, афæдзы кæронмæ нысантæй къухы цы бафтыд, ууыл.
Ивгъуыд къуырийы бæрæггæнæнты тыххæй доклад бакаст Хицауады Сæрдары хæдивæг Томайты Ирбег. Йæ ныхасмæ гæсгæ, республикæйы оперативон уавæр у нывыл.
– Цæгат Ирыстоны æппæт сæрмагонд службæтæ дæр архайынц æрвылбоны цæттæдзинады фæтк-мæ гæсгæ. Фæстаг къуырийы дæргъы æрцыд 23 зынгсирвæзты. Иууылдæр иуварсгонд æрцыдыс-ты, хъыгдард дзы ничи баййæфта. Транспорты æппæт хуызтæн дæр фадат ис Арвыком æмæ Транскамы фæндæгтыл ацæуынæн. Арвыкомы фæндагыл ацæуынмæ æнхъæлмæ кæсынц 980 уæзласæн автотранспортон иуæджы, уыдонæй 810 – сæрмагонд бынæтты. Ивгъуыд къуырийы дæргъы Уæрæсе æмæ Гуырдзыстоны арæныл дыууæрдæм ахызтысты 24260 автотранспортон иуæджы æмæ 55600 адæймагæй фылдæр, – загъта Томайы-фырт.
Цæгат Ирыстоны автоинспекцийы хъусынгæнинагмæ гæсгæ, фæстаг къуырийы дæргъы республикæйы фæндæгтыл æрцыд 104 фæндаггон фыдбылызы, 23 адæймаджы дзы хъыгдард баййæфтой, уыдонæй æртæ сты, 16 азы кæуыл нæма цæуы, ахæмтæ.
Сергей Меняйло аппаратон æмбырды фехъусын кодта, Нартыхъты Алыксандр республикæйы Сæргълæууæджы уынаффæгæнæгæй нысангонд кæй æрцыд, уый. Цы хæстæ æххæст кæндзæн, уыдоны æмрæнхъ уыдзæн ирон æвзаджы цифровизаци дæр. «Ирон æвзаджы хъæлæс» фæзындзæн æппæт зындгонд сервисты дæр, уыимæ «Яндекс»-ы дæр. Уый фæахъаз уыдзæн ирон æвзаджы рæзтæн, уырыссаг æвзагæй ирон æвзагмæ тæлмац кæнынæн. Уæ зæрдыл уын æрлæууын кæндзыстæм: Нартыхъты Алыксандр раздæр куыста Цæгат Ирыстоны Хетæгкаты Къостайы номыл паддзахадон университеты нымæцон трансформаци æмæ инновациты проректорæй.
Уымæй уæлдай, регионы раза-монæг куыд фæбæрæг кодта, афтæмæй Цæгат Ирыстоны тагъд рæстæджы скусдзæн туристон фæндагамонæг «Нымæцон Алани»-йы пилотон проект. Уым базонæн уыдзæн æппæт информаци дæр фысымуæттæ æмæ культурон бынæтты тыххæй. Æппæт уыцы хъуыддæгтæ сты республикæйы Культурæ æмæ Экономикон рæзты минист-радты бæрны. Дарддæр ма республикæйы Сæргълæууæг бафæдзæхс-та бакусын Цæгат Ирыстоны IT-горæт саразыны проектыл.
– IT-горæты хъуамæ кусой дæсны специалисттæ, æмæ йæ бындурыл цæудзысты ахуыртæ дæр. IT-компанитæн дзы хъæуы кусæн бынæттæ саразын, – загъта Сергей Меняйло.
Дарддæр «Роспотребнадзор»-ы регионалон хайад фехъусын кодта, республикæйы эпидемиологон уавæр нывыл кæй у, уый. ОРВИ-йæ рынчынты нымæц, иннæ азтимæ абаргæйæ, у афонмæ гæсгæ. Тъæнгты инфекцитимæ рынчынты нымæц у иннæ азты бæрæггæнæнтæй ныллæгдæр. Ивгъуыд къуырийы æмгъуыдмæ ног коронавирусон инфекциимæ сбæрæг кодтой 12 рынчыны.
Æмбырды ма ныхас цыд æндæр ахсджиаг фарстатыл дæр.
ХЪОЙБАЙТЫ Галинæ
