Ирыстоны нæлгоймæгтæй сæрмагонд æфсæддон операцийы чи архайы, уыдоны лæгдзинад æмæ хъайтардзинады кой дæрдтыл айхъуыст. Иу бон дæр, æвæццæгæн, ахæм нæ уыд, æмæ не ‘мзæххонтæй тохы быдыры мачи фесгуыха æмæ уый тыххæй хæрзиуæгæй хорзæхджын ма суа.
Æмæ та мæнæ цины уац сæмбæлд нæ республикæйы цæрджытыл – сæрмагонд æфсæддон операцийы архайæг Дзгойты Станиславæн лæвæрд æрцыд майдан «За спасение погибавших». Уый тыххæй указ бафыста Уæрæсейы Федерацийы Президент Владимир Путин, майдан та хъайтарыл сæмбæлын кодта РЦИ-Аланийы Сæргълæууæг Сергей Меняйло. Регионы разамонæг зæрдиаг арфæ ракодта Дзгойты Станиславæн, бæрзонд паддзахадон хæрзиуæгæй хорзæхджын кæй æрцыд, уый фæдыл.
– Тынг æхсызгон мын вæййы, нæ лæппутæ куы фесгуыхынц æмæ се сгуыхтдзинадæн аргъгонд куы ‘рцæуы, уæд. Станислав, дæу лæгæй-лæгмæ зонын. Уыдтæ, батальон «Алани»-йы рæнхъытæм бархионæй чи бацыд, уыцы фыццæгтимæ. Уæд хъæбатырæй тох кодтай Райгуырæн бæстæйы сæраппонд. Абон та сабыр царды æхсæнадæн хъомысджынæй лæггад кæныс. Ноджы стырдæр æнтыстдзинæдтæ дын мæ зæрдæ зæгъы! – загъта Сергей Меняйло.
Раздæр ма Дзгойты сахъ лæппу хорзæхджын ссис майдантæ «Æхсары тыххæй» Æмæ «Ирыстоны намысæн»-æй.
Станислав æнтыстджынæй каст фæци Уæрæсейы Мидхъуыддæгты министрады университет Бетъырбухы, стæй йæ цæттæдзинад фæуæлдæр кодта Уæрæсейы Президенты раз РАНХиГС-ы курсыты. Куыста мидхъуыддæгты оргæнты структурæйы, бæрнон бынæттæ ахсгæйæ.
Ныртæккæ Дзгойты Станислав у Дзæуджыхъæуы бирæкъабазон техникумы директор, парти «Иугонд Уæрæсе»-йы уæнг, Дзæуджыхъæуы Минæвæртты æмбырды депутат.
ГАПБАТЫ Алетæ
