РЦИ-Аланийы Сæргълæууæг Сергей Меняйлойы Указæй зындгонд журналист
Хæмыцаты Морисæн йæ куыстадон æнтыстдзинæдты тыххæй лæвæрд æрцыд Цæгат Ирыстоны Кады грамотæ.
Хæмыцы-фыртæн кадджын хæрзиуæг раттой, РЦИ-Аланийы Мыхуыр æмæ дзыллон коммуникациты хъуыддæгты фæдыл комитеты цы æмбырд уыд, уым. Йæ кадджын хæрзиуæджы тыххæй Морисæн арфæ ракодта комитеты сæрдары хæстæ рæстæгмæ æххæстгæнæг Эльдар Афашоков.
Хæмыцаты Морис æрмæст журналист нæу, уый зындгонд у, куыд фыссæг, тæлмацгæнæг æмæ футболон комментатор дæр. Уæрæсейы Журналистты цæдисы уæнг уæвгæйæ, Хæмыцы-фырт мыхуыры рауагъта бирæ публицистон уац-
мыстæ æмæ цалдæр чиныджы. Газеттæ «Рæстдзинад» æмæ «Северная Осетия»-йы уый цы зæрдиаг куыст фæкодта, уый фæрцы Ирыстоны журналистикæйы бацахста зынгæ бынат.
Фембæлды архайæг уыд Æрыдоны 4-æм лицейы ахуырдзау Цопанты Мария дæр. Æвзонг чызг нырма фыццаг къахдзæфтæ кæны журналистикæйы къабазы, фæлæ йæ архайд ныридæгæн бæрæггонд æрцыд РЦИ-Аланийы Сæргълæууæджы Арфæйы фыстæгæй. Æрæджы чызг йе сфæлдыстадон куыст балæвæрдта Цæгат Ирыстоны Сæргълæууæджы преми райсыны конкурсмæ журналистикæйы къабазы. Нæ зæрдæ дарæм, уыцы сфæлдыстадон ерысы дæр йæ архайд æнтыстджын кæй уыдзæн, ууыл.
РЦИ-Аланийы Мыхуыр
æмæ дзыллон коммуникациты хъуыддæгты фæдыл комитеты пресс-службæ
