Уæрæсейаг регионты ногæй рапарахат куыст федералон номарæн
проект «Уæлахизы цæсгæмттæ»-йыл. Уыцы змæлды бæрæг дары Цæгат Ирыстоны бавæрæн дæр.
Уый тыххæй фехъусын кодтой РЦИ-Аланийы Сæргълæууæг æмæ Хицауады пресс-службæйы.
Пресс-службæйы минæвары ныхасмæ гæсгæ, Фыдыбæстæйы Стыр хæсты чи архайдта, кæнæ, фæсчъылдымы фæллойгæнæг чи уыд, уыцы адæмы цардвæндаджы тыххæй хабæрттæ æмбырд кæнынц Цæгат Ирыстоны Хетæгкаты Къостайы номыл паддзахадон университеты. Фæстæдæр æппæт уыцы æрмæджытæ дæр лæвæрд æрцæудзысты Уæлахизы музеймæ (æрбынæттон Мæскуыйы).
«Цæгат Ирыстоны цæрджытæ зæрдиаг æргом аздæхтой амынд акцимæ. Уый ма сын иу фадат дæтты, цæмæй бæстæйы æппæт цæрджытæн дæр рахабар кæной нæ хис-
тæр фæлтæрты минæвæртты æгæрон хъæбатырдзинад æмæ хæстон сгуыхтдзинæдты тыххæй. Алкæцы ирон хæдзары дæр ис Фыдыбæстæйы Стыр хæсты хъæбатыр архайджытæ æмæ фæсчъылдымы фæллойгæнджыты тыххæй æрмæджытæ æмæ мысинæгтæ. Æмæ ма нын ацы акци иу фадат дæтты, цæмæй уыцы табуйаг хабæртты тыххæй æрмæджытæ хъахъхъæд æрцæуой, æрмæст бинонты азфысты нæ, фæлæ сын бынат уа Уæрæсейы сæйраг æфсæддон-историон хæзнадон – Уæлахизы музейы архивы», – номарæн мадзалы ахадындзинад фæбæрæг кæнгæйæ, бафиппайдта РЦИ-Аланийы Сæргълæууæг Сергей Меняйло.
Номарæн акци «Уæлахизы цæсгæмттæ»-йы архайæг суæвыны фадат алкæмæн дæр ис. Уый тыххæй æрмæстдæр хъæуы Уæлахизы музейы официалон сайты (дæлпроект «Уæлахизы цæсгæмттæ»-йы) регистраци скæнын æмæ хæсты хъæбатыр кæнæ фæсчъылдымы фæллойгæнæджы царды хабæрттæ уым равæрын. Уыимæ, анкетæйы кæрон фæбæрæг кæнын æмбæлы, æрмæджытæ Цæгат Ирыстоны паддзахадон университеты бæрнмæ лæвæрд кæй цæуынц, уый. Дарддæр æппæт историон æрмæджытæн дæр сæ фæндаг уыдзæн Уæлахизы музейы æвæрæнтæ æмæ экспозицитæм.
Уæлахизы музейы «Рæстдзинад»-æн куыд радзырдтой, афтæмæй бæстæйы цæрджытæ стыр цымыдисдзинад равдыстой номарæн акцимæ. Абоны онг уал 11 мин уæрæсейаг бинонтæй фылдæр «Уæлахизы цæсгæмттæ»-йы электронон экспозицимæ барвыстой сæ хæстонты хабæрттæ. Акцийы зæрдиагдæр архайджытæ сты Новосибирск æмæ Мæскуыйы облæстты, Краснодары край, Мæскуы æмæ Цæгат Ирыстоны цæрджытæ…
КАЛМАНТЫ Аслан
