22-24 майы Хъырымы Максим Горькийы номыл уырыссаг академион драмон театр Цæгат Ирыстоны Тæбæхсæуты Балойы номыл Ирон театры сценæйы равдисдзæн æртæ мидисджын спектаклы.
Хъырымаг артисттæ нын кæй равдисдзысты, уыцы спектакльтæ дзурæг сты царды æртæ сæйраг æууæлыл – рæстæгыл, равзæрст фæндагыл æмæ уарзондзинадыл.
Номдзыд уæрæсейаг фыссæг Антон Чехов 1903 азы кæй ныффыста æмæ, абон дæр стыр ахадындзинад кæмæн ис, 22 майы Ирон театры сценæйы ацæудзæн ахæм пьесæ «Вишневый сад»-мæ гæсгæ æвæрд спектакль.
– Рæстæг баст у спектаклы сæйраг архайæгимæ. Царды куыд вæййы, афтæ адæмæй иутæ цин кæуыл фæкæнынц, иннæтæ та – хъыг, спектаклы ныхас цæуы ахæм раивдыл, –зæгъы режиссер-æвæрæг Анжелика Добрунова.
Æндæразæй нырмæ Добрунова у хъырымаг театры сæйраг режиссер. Уымæй размæ сылгоймаг куыста театры актрисæ, сценарист æмæ сценографæй.
Адæймагмæ фæдис æмæ узæлды æнкъарæнтæ чи ‘взæрын кæны, 23 майы театры сценæйы цæудзæн Алла Новиковайы пьесæмæ гæсгæ æвæрд ахæм спектакль «Стоянка в Нагасаки» (пьесæ фыст у Валентин Пикулы роман «Три возраста Окини-сан»-мæ гæсгæ).
Бирæвæрсыг уацмысæй равзæрстой æппæтæй ахадгæдæр æууæл – 1880 азты уырыссаг денджызон афицер Владимир Коковцев æмæ япойнаг чызг Окини-саны уарзондзинад. Афицер æмæ чызг фембæлдысты япойнаг наулæууæн Нагасакийы. Ссæдз азы фæстæ бацайдагъ сты уырыссаг-япойнаг хæсты рæстæг дыууæ бинойнаджы æнкъарæнтæ раргом уыдзысты.
Спектаклы режиссер-æвæрæг æмæ рæстæмбис кары Владимир Коковцевы ролы хъазы Сергей Ющук.
24 майы Ирон театры сценæйыл цæудзæн Ярослав Стельмахы уацмысмæ гæсгæ æвæрд спектакль «Любовь в стиле Барокко».
Сæрибардзинад ныййарæджы бынтæй уæлдæр чи æвæры æмæ, ус ракурын кæй нæ фæнды, спектаклы ныхас цæуы ахæм æрыгон Графыл. Фыды фæдзæхст чи нæ бахæст кодта æмæ афтæмæй æнæзонгæ Олянæйы чи нæ ракура, уыцы Граф ныййарæджы хæдзарæй фæиппæрд уыдзæн. Чызг чындзыцыдыл цæмæй ма сразы уа, æрыгон Графы фæнды ууыл æй бафтауын. Ацы фæндæй цы рауайдзæн, театрдзаутæ уый сæхæдæг фендзысты.
– Æстæм майæ дæсæм майы онг Ирон театр йæхи спектакльтæ равдисдзæн хъырымаг театры сценæйы. Гастролон балцы фæрцы нын уыдзæн нæхи сфæлдыстад равдисын æмæ æндæр регионы цардимæ базонгæ уæвыны фадат. Уæрæсейы Президент Владимир Путины указмæ гæсгæ, ацы аз нæ бæстæйы Адæмты иудзинады азыл нымад кæй у, уымæ гæсгæ кæрæдзимæ цæуыны гастрольтæн ис уæлдай стырдæр ахадындзинад. Регионтимæ бастдзинæдтæ аразыныл архайæм. Сфæлдыстадæн территорион арæнтæ нæй, – зæгъы Ирон театры аивадон разамонæг Уалыты Гиви.
Цæгат Ирыстоны Тæбæхсæуты Балойы номыл паддзахадон академион театры пресс-службæ
