Уæрæсейы Президент Владимир Путин паддзахадон хæрзиуджытæ ратта боксæй дунеон чемпионатты уæлахиздзаутæн. Уый хъусын кæны РИА Новости.
Кадджын æмбырды Кремлы Владимир Путин спортсментæн раарфæ кодта. Хæлардзинады орден лæвæрд æрцыд Боксы федерацийы æххæстгæнæг комитеты сæрдар Умар Кремлевæн, стæй боксæй 92 килограммы онг уæзы дунейы æртæ хатты чемпион, Уæрæсейы спорты сгуыхт мастер Муслим Гаджиевæн.
«Фыдыбæстæйы раз сгуыхтыты 2-аг къæпхæн»-ы ордены майдан райстой къахъухæй æрмхæсты архайæг Петр Ян, боксер-профессионал Гасситы Мурат, Уæрæсейы Боксы федерацийы секретарь Александр Беспутин, боксертæ Нуне Асатрян, Шарабутдин Атаев, Джамбулат Бижамов, Елена Гапешина, Салтанат Мерденова, Исмаил Муцольгов, Илья Попов, Давид Суров, Анастасия Шамонова æмæ Всеволод Шумков.
