Дзæуджыхъæуы Спортивон хъæбысхæсты цæттæгæнæн центры (Цоколайы-фырты уынджы 23а хæдзары) абон, 30 сентябры, райдыдтой дунеон къласы спорты мастер Годжиты Владимиры номарæн Æппæтуæрæсеон ерыстæ шпагæтæй хæцынæй. Турнир ахъаз у паддзахадон программæ «Уæрæсейы спорт»-ы нысантæ сæххæст кæнынæн – активон цардыуаг парахат кæнынæн, æрыгон фæлтæры иудадзыг спорты архайынмæ разæнгард кæнынæн.
Уæрæсейы Федерацийы алы регионтæй нæ республикæйы сæйраг горæтмæ ссæудзысты æмæ хæрзиуджытæ рамбулыныл тох кæндзысты дыууæсæдæйæ фылдæр рæхойгæ ‘хсаргардæй тыхджындæр хæцджытæ. Уыимæ, Цæгат Ирыстоны иугонд командæйы республикæйы кад хъахъхъæндзысты хæрздзæттæ 30 спортсмены. Ерыстæ ахæсдзысты æртæ боны: 30 сентябры æмæ 1 октябры тох кæндзысты, 21 азы онг кæуыл цæуы, уыцы чызджытæ æмæ лæппутæ – юниортæ, 2-3 октябры та сæ хъарутæ æвзардзысты, 24 азы онг кæуыл цæуы, уыцы спортсментæ. Æппæт тохтæ дæр райдайдзысты 10:00 сахатыл.
Турнир аразджытæ сты РЦИ-Аланийы Физикон культурæ æмæ спорты министрад æмæ республикæйы Фехтованийы федераци.
Годжиты Владимир у, рæхойгæ ‘хсаргардæй хæцджытæй ирон спортсментæй фыццагдæр дунеон æмвæзадмæ чи схызт, уыдонæй иу. Тренер Альберт Григоряны хъомылгæнинаг бирæ рæстæджы дæргъы нымад уыд нæ бæстæйы техникон æгъдауæй тыхджындæр фехтовальщикыл. Владимир æртæ хатты рамбылдта Профессионалон цæдисты æппæтцæдисон центрон советы чемпионат (ВЦСПС), æртæ хатты – Уæрæсейы чемпионат, æртæ хатты та бацахста Советон Цæдисы ерысты призон бынæттæ. 1965 азы Годжийы-фырт дунеон чемпионаты рамбылдта æвзист майдан. Курдиатджын фехтовальщикæн ма йæ къухы бафтыдаид ноджы стырдæр спортивон æнтыстдзинæдтæ, фæлæ æвирхъауæй фæмард.
Агънаты Алетæ
